Punësim rekord në SHBA – Shtohen 228 mijë vende pune, papunësia në 4.1%
Punësimi në Shtetet e Bashkuara të Amerikës u rrit me një hap më të shpejtë gjatë muajit Nëntor tregojnë të dhënat e fundit, që portretizojnë kështu një situatë ekonomike mjaft të shëndetshëm.
Ekspertët madje argumentojnë se, në situatën ku ndodhet aktualisht, ekonomia amerikane nuk ka nevojë për stimujt shtesë fiskal që propozon Donald Trump.
Punësimi në sektorin jo bujqësor u rrit kështu me 228 mijë vende pune gjatë muajit Nëntor tregojnë të dhënat e departamentit të punës. Të dhënat e muajit Tetor ndërkohë janë rishikuar lehtë në territor pozitiv, dhe tani flasin për 244 mijë vende të reja pune.
Të dhënat e nëntorit janë të parat pas stuhive të njëpasnjëshme që goditën vendin dhe punësimin për rrjedhojë. Sa i përket pagave, këto të dhëna flasin për një rritje me 0.2% gjatë Nëntorit, pas një rënie me 0.1% gjatë muajit paraardhës.
Kjo e ka çuar rritjen vjetore të pagave në 2.5% deri më tani, nga 2.3% që ishte në muajin tetor. Norma e papunësisë mbetet kështu e pandryshuar në 4.1% që është edhe niveli më i ulët në 17 vite.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.