Punësimet gjatë verës – 30% më shumë studentë se një vit më parë në Rezidencën Studentore
Rritet me rreth 30% numri i studentëve të cilët kanë zgjedhur për arsye punësimi të qëndrojnë në godinat e qytetit studenti gjatë periudhës së verës.
Sipas burimeve të drejtorisë pranë Rezidencës Studentore Universitare për Televizionin SCAN, rezulton se janë rreth 1040 studentë të cilët qëndrojnë të strehuar pranë godinave të vënë në dispozicion nga kjo drejtori. Ashtu sikurse ndodh çdo vit pranë qytetit Studenti caktohen godina ku këtë vit janë 4 të tilla dy prej godinave janë për vajzat dhe dy të tjerat për djemtë.
Strehimi gjatë verës përfshin dy muajt gusht dhe shtator dhe për këtë bëhet një regjistrim i veçantë pranë drejtorisë së qytetit studenti. Ndërkohë që pagesa ngeli e pandryshuar krahasuar me verën e viti të kaluar për të dy muajt duke përjashtuar muajin korrik i cili përfshihet në pagesën vjetore të studentit , tarifa e verës shkon në 9 mijë lekë ose 45 mijë lekë të vjetra në muaj.
Një vit më parë në godinat e qytetit studenti qëndruan për arsye punësimi gjatë stinës së verës rreth 700 studentë.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.