Punësimet në administratën publike, Harito: 55 mijë aplikime, 20 për qind e vendeve të paplotësuara
Punësimet e reja në administratën publike vijojnë të jenë në fokus të debateve politike në prag të fushatës elektorale. Ministrja për Inovacionin dhe Administratën Publike, Milena Harito, gjatë diskutimeve në seancën plenare për projektligjin për urdhrin e punonjësve socialë, tha se gjatë tri viteve ka pasur rreth 55 mijë aplikime dhe 20 për qind e vendeve vakante kanë mbetur të paplotësuara.
Ministrja theksoi se nëpunësit civilë në nivele të larta, nuk duhet të jenë anëtar të partive politike, duke paralajmëruar subjektet që të verifikojnë anëtarët e tyre.
Në muajin shkurt të këtij viti Departamenti i Administratës Publike hapi procedurat e aplikimeve në shërbimin civil. Nga 1100 vende të lira pune, rreth 670 pozicione u caktuan për punonjësit e rinj, ndërsa pjesa tjetër për ata punonjës të administratës që kërkonin ngjitje në karrierë.
Po në shkurt të 2017 qeveria miratoi edhe një vendim për rritjen e të punësuarve me kontratata të përkohshme.
Florenc Drizari/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.