Punësimi në Ballkanin Perëndimor – BB: Rritja më e lartë në Shqipëri dhe në Mal të Zi
Shqipëria dhe Mali i Zi po shfaqin rritjen më të lartë të punësimit në rajonin e Ballkanit Perëndimor. Sipas raportit të Bankës Botërore, “Tendencat e Tregut të Punës në Ballkanin Perëndimor për vitin 2019”, punësimi në Shqipëri u rrit vitin e kaluar me 3.3%, i udhëhequr sidomos nga krijimi i vendeve të reja të punës në sektorët e industrisë dhe shërbimeve.
Papunësia pësoi ulje historike në shumicën e vendeve të rajonit, duke rënë në 15.3% gjatë vitit të kaluar. Shkalla e papunësisë lëviz nga 12% në Serbi dhe Shqipëri, deri në 29% për Kosovën. Raporti vëren se punësimi informal, një nga sfidat më të mëdha të tregjeve të punës të Ballkanit Perëndimor, është ende në rritje në Shqipëri dhe në Maqedoninë Veriore.
Në vitin 2018 ishin të rinjtë, gratë e moshuara dhe punonjësit me arsim të ulët ata që kishin më shumë gjasa të kryenin punë informale. Pavarësisht pozicionit të tyre të vështirë në tregun e punës, situata e punësimit të të rinjve vazhdoi të përmirësohej. Norma e papunësisë në radhët e të rinjve pësoi rënie me 3 pikë përqindje deri në 34.6%.
Raporti konstaton se tatimi mbi të ardhurat e punës në Ballkanin Perëndimor është relativisht i lartë për punonjësit me pagë të ulët dhe për ata që kanë persona të tjerë në varësi. Sipas raportit, punonjësit me pagë të ulët janë në një situatë edhe më të pafavorshme në tregun formal të punës dhe këto disavantazhe kthehen në një pengesë shtesë për punonjësit kur bëhet fjalë për tu formalizuar.
Banka Botërore vlerëson se një reformë e gjerë e të gjithë sistemit të tatimit të punës dhe të sigurimeve shoqërore mund të shërbejë si metoda më premtuese për ringjalljen e tregjeve të punës në Ballkanin Perëndimor.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.