Punësimi nepotik! Rreziqet e gjetjes së punës nëpërmjet miqve

Përpara se të aplikoni për një punë, nëpërmjet një të njohuri, apo një miku, duhen patur parasysh shumë gjëra. Arsyeja është e thjeshtë, sepse, pavarësisht se çfarë mendoni ju, përfshirja e miqve dhe familjarëve në kërkimin tuaj për punë mund t’ju dëmtojë. Të gjithë i dinë problemet që mund të lindin, kur në punë kanë shokë, miq, apo anëtarë të familjes. Për këtë arsye, kjo prani mund të rezultojë si kundërproduktive.

Nëse ju jeni një prej personave që keni fituar vendin e punës, nëpërmjet një miku, shoku, apo anëtari të familjes, mund të përballeni me rreziqe dhe të dëmtoni marrëdhënien me personin që ju ka futur në punë. Në momentin kur ju kërkoni një punë nëpërmjet një shoku, shpesh do të habiteni se ai nuk dëshiron t’ju ndihmojë për një vend pune në biznesin e tij. Një prej gjërave më të zakonshme që bëjnë punëkërkuesit është se mendojnë që miqtë janë aleatët më të mirë në kërkimin e punës. Tregu i punës është një mjedis i ashpër. Miqtë tuaj, sigurisht, i njohin të gjitha aftësitë tuaja dhe ju vlerësojnë për atë që keni.

Ju mendoni se për ata është më mirë të mbështeten te një mik, apo shok, sesa te një i huaj, por kjo nuk është e vërtetë në shumicën e rasteve. Problemi kryesor te përdorimi i miqve, për t’ju ndihmuar për të gjetur punë është se ju nuk e njihni kurrë mikun tuaj, sa mendoni. Shumica e njerëzve, në mënyrë instiktive, janë në konkurrencë me njëri-tjetrin. Të punosh me njerëz të afërt, miq, apo shokë, do të thotë që shpesh ju të jeni dakord me ata vetëm sepse i keni miq.

Në fakt, nëse ju shpenzoni më shumë se disa orë me familjen, apo me një grup miqsh, ju do të vini re një gjë të tillë, pothuaj çdo pesë minuta, përgjatë çdo bisede. Miqtë dhe familja, shpesh, mund të thonë se i pëlqejnë shijet tuaja muzikore, stilin e veshjes, shtëpinë, apartamentin, mënyrën e të shkruarit. Ka të ngjarë që ata ta kenë seriozisht këtë, por ka edhe raste që jo. Mendimi për të kërkuar ndihmë te një mik, për të gjetur një vend pune është në fakt një përpjekje për t’u mbrojtur nga ashpërsia e mjedisit të punës. Një prej gjërave më të zakonshme që ndodh kur dikush i kërkon një shoku, apo një kushëriri ndihmë për një vend pune është se ata e marrin CV-në tuaj, mendohen dhe, për një arsye, apo tjetrën, vendosin për të mos e çuar përpara.

Ju nuk mund ta imagjinoni se sa e zakonshme është një gjë e tillë. Ata do t’ju thonë me mirësjellje se do të interesohen, por nuk do ta bëjnë. Miqtë tuaj mund të gënjejnë zakonisht dhe të thonë se janë interesuar për të shmangur hezitimin e tyre kundrejt “nderit” që i keni kërkuar. Kjo mund të ndodhë edhe sepse një mik, apo një kushëriri juaj, thjesht nuk do që të punojë në të njëjtën zyrë me ju, ose, mbase ai nuk do që të mbajë përgjegjësi për atë që ju mund të bëni pasi të punësoheni. Një arsye tjetër është sepse miku juaj, ndershmërisht, nuk mendon se ju jeni plotësisht të aftë për atë vend pune.

Të gjitha këto gjëra, ai nuk mund t’jua thotë ju dhe sërish ju nuk do ta merrni vesh këtë. Punëdhënësi mund të mos e shohë kurrë CV-në tuaj, të cilën e keni dërguar nëpërmjet mikut. Shumica e miqve flasin për njëri-tjetrin me grupe të tjerë shokësh e jo të gjitha këto biseda janë të këndshme. A keni ndonjë mendim se çfarë mund të thonë shokët tuaj për ju? Këtu nuk përjashtohet rasti që të ketë edhe mendime negative.

Nëse individët, të cilët janë miq, apo kushërinj punojnë së bashku, kompanitë kanë shqetësimin se këta mund të bashkëpunojnë për të përmbushur më shumë interesat e tyre, sesa të kompanisë. Nepotizmi, gjithashtu, mund të ulë moralin e punonjësve të tjerë të zotë, të cilët punojnë me njerëzit që janë punësuar nëpërmjet miqve dhe kështu nxitet edhe ideja se shpërblimet, pagat, apo promovimet në detyrë nuk janë të drejta. Një ose dy miq, apo shokë mund të reagojnë negativisht, (dhe në kundërshtim me interesat e kompanisë), në momentin kur kritikohet tjetri.

Në këtë mënyrë edhe perceptimi bëhet një problem serioz, pasi punonjësit e tjerë do të perceptojnë trajtim jo të drejtë të kolegëve, apo të vetes, në krahasim me njerëzit që janë futur në punë aty me mik. Duhet patur parasysh se jo të gjithë punëdhënësit mund të jenë kundër nepotizmit. Për shembull, në bizneset e vogla familjare, si studiot ligjore, kjo është një gjë e zakonshme, sepse ofron një mundësi të mirë për të identifikuar punonjës të përkushtuar. Nepotizmi, gjithashtu, mund të nxisë një mjedis të përkushtuar familjar, që mund të rrisë moralin e gjithsecilit, si të miqve, ashtu edhe shokëve.

Shmangia, në shumicën e rasteve

Nëse ju pranoni një vend pune që ofrohet nga një mik, apo i afërt i familjes, duhet të kini kujdes. Në fund, akti i mirësjelljes mund të prishë ekuilibrat e miqësisë suaj. Miqtë e punësuar, apo kushërinjtë, do të gjejnë të gjitha llojet e justifikimeve për t’i treguar botës dhe vetes së tyre se ata e meritojnë plotësisht një gjë të tillë. Një mendim i tyre mund të jetë besimi se ata janë punësuar, si nder për të gjitha ato gjëra që ata kanë bërë për familjen. Një aspekt tjetër mund të jetë se personi i punësuar, mund të fillojë të krahasojë veten me të tjerët, brenda të njëjtës kompani dhe të besojë se është më inteligjent dhe më i zoti se ata që janë aty.

Për rrjedhojë, njerëzit e punësuar me mik i justifikojnë pozicionet e tyre duke sulmuar në mënyrë të padrejtë kolegët e tyre. Reagimi më i zakonshëm është se miku, apo familjari mund të indinjohet ndaj personit që e ka ndihmuar për vendin e punës. Të bërit nder mund të perceptohet në sytë e të punësuarit nepotik, se ai është punësuar për shkak të kësaj, e jo në bazë të meritës. Nuk duhet harruar se ai për të cilin punoni dëshiron mbi të gjitha që procesi i punës të kryhet siç duhet dhe të mos cënohet, sesa të ruajë marrëdhëniet farefisnore apo shoqërore me ju. Në momentin që cënohet puna, ky lloj afrimiteti zbehet.

Statusi juaj si një shok, apo kushëri i dikujt, nuk do të thotë se ju jeni automatikisht ai që mund ta bëni me mirë punën. Nëse ju nuk mund ta bëni punën në mënyrën më të mirë të mundshme do të rriten pakënaqësitë, kur shoku, apo kushëriri juaj do të kërkojë një njeri tjetër që ta ndihmojë për një çështje të caktuar në punë. Ndjenjat personale e zbehin faktin se ka punë që duhet bërë në një mënyrë të veçantë dhe të efektshme.

Në një mjedis pune, ku të gjithë vlerësohen dhe gjykohen me meritë ka më shumë produktivitet, ndershmëri dhe një mjedis biznesi të mirë. Pavarësisht avantazheve, vendi i punës me mik mund t’ju dëmtojë. Nëse ju hyni në punë me mik, ju rrezikoni uljen e konsideratës dhe opinionit që ka rrethi shoqëror për ju, të cilët mund t’i shohin lidhjet tuaja si një mungesë të aftësisë tuaj për të fituar një vend pune me meritë.

Renato Hysenllari/SCAN Magazine

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.