Putin mbështet çmimet e naftës. Sinjalizon se Rusia do të vijojë me marrëveshjen për uljen e prodhimit

Nafta po qëndron në rritje të lehtë edhe në sesionin e sotëm, pasi Presidenti rus, Vladimir Putin, sinjalizoi se është i gatshëm për të shtyrë marrëveshjen për uljen e prodhimit përtej muajit dhjetor të këtij viti. Nafta Brent e Londrës po tregtohet në rreth 42.5 dollarë për fuçi, ndërsa në sesionin e kaluar u rrit me rreth 1.7%. Nafta Bruto amerikane po tregtohet në rreth 40.7 dollarë për fuçi, pas rritjes me 1.5% një ditë më parë.

Putin deklaroi se Rusia nuk e shikon të nevojshme për të rritur kuotat e prodhimit, në një kohë që përhapja e koronavirusit po dëmton rimëkëmbjen për naftë. Komentet e Putin ishin një mesazh i qartë se Rusia, një ndër prodhuesit më të mëdhenj në botë të naftës, është e përgatitur të shtyjë marrëveshjen e paprencedentë për të ulur prodhimin me 7.7 milionë fuçi në ditë, në përgjigje të kërkesës së dobët. Njëkohësisht, rritja e infektimeve të reja me Covid-19 në Europë dhe SHBA do të vijojë t’i mbajë nën presion çmimet e naftës, pasi disa vende kanë rikthyer kufizimet lokale. Franca ka zgjatur në kohë shtetrrethimin për rreth 2/3 e popullsisë së vendit, ndërsa në Belgjikë ministri i jashtëm është vendosur nën kujdes intensiv pasi ditë më parë ka rezultuar pozitiv me Covid-19.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.