Pyongyang shkel sanksionet, OKB: Ka ndërtuar një rrjet mjaft të sofistikuar
Korea e Veriut po arrin t`i shmangë sanksionet ndërkombëtare nëpërmjet një rrjeti të sofistikuar kompanish jashtë vendit, tregon një raport i fundit i Organizatës së Kombeve të Bashkuara i zbuluar pjesërisht nga Reuters.
Korea e Veriut prej kohësh është nën sanksione të rënda nga Kombet e Bashkuara si dhe nën një embargo armësh, në mënyrë që të frenohen sadopak programet bërthamore. Një panel ekspertësh i Organizatës së Kombeve të Bashkuara, ka përpiluar një raport prej 100 faqesh duke evidentuar shkeljet e këtyre sanksioneve.
“Ente dhe banka të caktuara kanë vijuar të operojnë në një ambient të sanksionuar nëpërmjet agjentëve të mirëtrajnuar dhe me eksperiencë në lëvizjen e parasë, njerëzve dhe mallrave, përfshirë edhe armët”-citon raporti i OKB.
Vendet anëtare të organizatës duhet të rrisin mbikëqyrjen ndaj diplomatëve koreano veriorë të angazhuar në aktivitete tregtare dhe financiare, pasi disa prej tyre po mbështesin një rrjet të paligjshëm financiar, vijon raporti. Mekanizmi nëpërmjet të cilit Pyongyangu po shmang sanksionet është tejet i sofistikuar nënvizon OKB.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.