Qendër e re sociale në Tiranë – Përfitojnë 170 familje në nevojë dhe 300 fëmijë në Bregun e Lumit
Rreth 170 familje në nevojë dhe 300 fëmijë të moshës 4 deri 15 vjeç do të përfitojnë shërbime sociale, përmes qendrës më të re komunitare që i është shtuar së fundmi pranë Bregut të Lumit. Qendra do të funksionojë si mjedis për zhvillimin e aktiviteteve që synojnë përmirësimin e cilësisë së jetës së komunitetit.
Kreu i Bashkisë së Tiranës, Erion Veliaj dhe anëtari i Parlamentit Evropian, Knut Fleckenstein, përuruan Qendrën Komunitare Multifunksionale, e cila ishte objekti i tretë që u ndërtua nga Bashkia e Tiranës në këtë zonë, me mbështetjen e BE-së, pas ndërtimit të shkollës “Ardian Klosi” dhe një kopshti.
“Ata që kanë bërë diçka të mirë për ne janë miqtë e BE-së, KE-së dhe Parlamentit Europian sepse duke na dhënë këtë qendrën këtu, na kanë dhënë një mjedis fantastik për fëmijët, ku mund të bëjmë kurse, të mësojmë, të ushqehemi dhe të bëjmë detyrat e shtëpisë. Unë besoj se një qytet me kaq shumë probleme, vlerësojmë jo ata që ankohen dhe thonë: ‘Shiko sa probleme ka’, por ata që thonë: ‘Po, ka probleme, por ne do t’ju ndihmojmë’”, tha Veliaj.
“Jam shumë i lumtur që më ftuat këtu dhe jam shumë i lumtur që Bashkimi Europian dha disa para që ju mund t’i përdorni sepse jo gjithmonë politikanët japin para. Së dyti, do të doja t’u them pse po e bëjmë një gjë të tillë, pse kryebashkiaku po e bën një gjë të tillë, pse Bashkimi Europian po e bën një gjë të tillë: Ne duam t’ju ndihmojmë që të bëheni të fuqishëm dhe të mençur. Dua që të më premtoni që kur ju të rriteni, të bëheni më të fuqishëm, të jeni ju ata që do të kontribuoni në këtë vend që të bëhet më i mirë”, u shpreh Fleckenstein.
Kjo qendër komunitare, përveç edukimit të të rinjve, një vëmendje të rëndësishme do t’i kushtojë edhe fuqizimit të të moshuarve dhe targetgrupeve të tjerë në mënyrë që të sigurohet pjesëmarrja e tyre në zhvillimin e komunitetit. Përmes programeve specifike të asistencës, orientimit e sigurimit të shërbimeve përkatëse, synohet gjithashtu gjithëpërfshirja dhe integrimi i Personave me Aftësi të Kufizuar si pjesë e komunitetit.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.