Qendra e re e Fierit, FSHZH hap tenderin – Do të ketë një kosto prej 5.6 milionë eurosh

Pak javë pas prezantimit me video të projektit për rikonceptimin e qendrës së qytetit të Fierit, Fondi Shqiptar i Zhvillimit ka hapur zyrtarisht tenderin për punimet. Fondi limit i caktuar është prej 708.1 milionë lekësh pa TVSH, ose rreth 5.6 milionë euro.

Grafiku i punimeve përcakton një kohështrirje prej 18 muajsh, çka do të thotë se inaugurimi i sheshit do të bëhet me shumë gjasa në fillim të vitit 2020. Ndërhyrja do të nisë nga shtrati i lumit Gjanica; rikonstruksioni i fasadave në qendër të qytetit dhe punime të ndriçimeve në disa rrugë.

Më pas punimet do të vijojnë më ndërtimin e tre urave mbi lumin si dhe për ndërtimin e parkimit nëntokësor nën qendrën e qytetit. Vetëm puna ndërtimore për parkingun llogaritet të kushtojë rreth 117 milionë lekë, ndërsa ndërtimi i urave llogaritet në 99.6 milionë lekë.

Secila prej urave do të ketë një dizajn të veçantë, ku ndër elementët që bien në sy janë korimanot me xham për uron qendrore, si dhe ura e kishës, e cila do të jetë me harqe dhe do të ketë një korsi biçikletash.

Sheshi i rikonceptuar është parashikuar të lidhet me lumin përmes shkallareve, të cilat janë një pjesë e rëndësishme e projektit, pasi do t’i japë banorëve lirshmërinë për të aksesuar drejtpërdrejt lumin. Projekti synon të rikthejë lumin Gjanica në një nga asetet më të rëndësishme natyrore të zonës urbane të qytetit të Fierit dhe të konceptojë një shesh qendror, i cili mungon për qytetin.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.