Qëndroi deri në gjunjë në mes të detit për fjalimin e tij të COP26 – Cili ishte mesazhi i Ministrit të Paqësorit?! (FOTOT)
Ministri i Jashtëm i Tuvalut ka mbajtur një fjalim në konferencën e Kombeve të Bashkuara për klimën në Glasgow, duke qëndruar deri në gjunjë në ujin e detit për të treguar sesi kombi i tij ishullor në Paqësor është në vijën e parë të ndryshimit të klimës.
Imazhet e Simon Kofe duke qëndruar me kostum dhe kravatë në një foltore të ngritur në det, me këmbët e pantallonave të mbështjellë, janë shpërndarë gjerësisht në mediat sociale, duke tërhequr vëmendjen në luftën e Tuvalut kundër rritjes së nivelit të detit.
“Deklarata krahason vendosjen e COP26 me situatat e jetës reale me të cilat përballet Tuvalu për shkak të ndikimeve të ndryshimeve klimatike dhe rritjes së nivelit të detit dhe thekson veprimin e guximshëm që Tuvalu po ndërmerr për të adresuar çështjet shumë të ngutshme të lëvizshmërisë njerëzore nën ndryshimet klimatike,” u shpreh Kofe për video-mesazhin e tij në konferencë.
Videoja është xhiruar nga transmetuesi publik TVBC në skajin më të largët të Fongafale, ishullit kryesor të kryeqytetit Funafuti, tha një zyrtar qeveritar.
Ai do të shfaqet në samitin e klimës të martën dhe vjen pasi liderët rajonalë bëjnë thirrje për veprime më agresive për të kufizuar ndikimin e ndryshimeve klimatike.
Shumë ndotës të mëdhenj janë zotuar të intensifikojnë reduktimet e tyre të karbonit gjatë dekadave të ardhshme me disa që synojnë emetimet neto zero të karbonit deri në vitin 2050. Por udhëheqësit e Ishullit të Paqësorit kanë kërkuar veprim të menjëhershëm, duke vënë në dukje se vetë mbijetesa e vendeve të tyre të ulëta është në rrezik. (Reuters)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.