Qershori, muaj jo i mbarë për mallrat shqiptare! Rënie e ndjeshme e eksporteve. Edhe në rang 6 mujori, situata jopozitive
Qershori 2019 ka qenë një muaj jo i mirë për eksportet shqiptare. Të dhënat zyrtare të INSTAT tregojnë se ato janë ulur me 4.4 % krahasuar me qershorin e vitit të kaluar e me 8.2 % në krahasim me muajin e kaluar. Edhe importet kanë njohur ulje gjithashtu.
Ato janë ulur me 1.5 % në krahasim me qershorin e një viti më parë dhe me 9.6 % në krahasim me majin e vitit 2019. Deficiti tregtar i këtij muaji është 28 miliard lekë duke u rritur me 1.4 % krahasuar me qershorin e vitit 2018 dhe duke u ulur me 10,8 % në krahasim me majin e vitit 2019.
Në gjashtëmujorin e parë të vitit 2019 eksportet e mallrave arritën vlerën 152 miliardë lekë, duke u ulur me 3,7 %, krahasuar me një vit më parë, ndërsa importet e mallrave arritën vlerën 318 miliardë lekë, duke u rritur me 2,6 %, krahasuar me një vit më parë. Deficiti tregtar arriti vlerën 165 miliardë lekë, duke u rritur me 9,2 %, krahasuar me të njëjtën periudhë të 2018.
Ulja vjetore e eksporteve prej 4,4 %, këtë muaj është ndikuar nga grupet: “Minerale, lëndë djegëse, energji elektrike” me -3,8 pikë përqindje, “Materiale ndërtimi dhe metale” me -2,7 pikë përqindje, “Makineri, pajisje, pjesë këmbimi” dhe “Tekstile dhe këpucë” me -0,4 pikë përqindje. Në ndryshimin vjetor të eksporteve ka ndikuar pozitivisht grupi: “Ushqime, pije, duhan” me +1,1 pikë përqindje
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.