Qeveria e re, Meta: Me rëndësi zbatimi i reformës në drejtësi dhe integrimi i Shqipërisë në BE
Pas betimit të qeverisë së re, në fjalën e tij Presidentit i Shqipërisë, Ilir Meta theksoi se nga parlamenti i ri, shqiptarët presin zbatimin e reformës në drejtësi dhe integrimin e vendit në BE.
“Dëshiroj që në këtë moment të rëndësishëm të betimit të qeverisë së re të ndaj me ju dhe ata që na ndjekin urimin tim më të sinqertë për suksesin dhe rezultatet sa më pozitive në qeverisjen e vendit. Shqipëria dhe shqiptarët presin nga qeveria e re, nga parlamenti i ri, nga mazhoranca, por edhe nga opozita përgjegjësitë më të mëdha për të përballuar me sukses sfidat që kemi përpara. Si presidenti i Republikës dua të theksojë rëndësinë e jashtëzakonshme që ka përshpejtimi i zbatimit të reformës në drejtësi, në mënyrë që të krijohen sa më shpejt institucionet e reja të drejtësisë, me qëllim forcimin e sundimit të ligjit, të luftës kundër korrupsionit dhe krimit të organizuar, por edhe të përmirësimit të klimës së biznesit në vend”.
Meta deklaroi se për anëtarësimin e Shqipërisë drejt BE duhet të ketë një bashkëpunim mes mazhorancës dhe opozitës.
“Anëtarësimit të Shqipërisë në Bashkimin Europian është një aspiratë kombëtare, ndaj besoj se qeveria, por edhe opozita do të bashkëpunojnë ngushtë për realizimin e këtij objektivi të përbashkët madhor dhe përmbushjen e të gjitha reformave kyçe, me qëllim çeljen e negociatave për anëtarësimin e sa më shpejt në BE”.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.