Qeveria gjermane, shpërblim për refugjatët që kthehen në atdhe
Qeveria federale gjermane dëshiron të motivojë refugjatët të kthehen vullnetarisht në vendet e tyre të origjinës. Në fillim të Marsit do të fillojë një program kthimi, i cili do të prekë 11 shtete, nga ku njerëzit pa perspektivë qëndrimi në Gjermani do të marrin një stimul financiar për t’u kthyer.
Lajmërimin e bëri Ministria Federale Gjermane për Zhvillim dhe Bashkëpunim Ekonomik. Buxheti për këtë program, i cili arrin shumën e 150 milionë eurove, u miratua nga parlamenti nëntorin e kaluar.
Programi i riatdhesimit përfshin kryesisht vendet e Afrikës Veriore dhe Ballkanit, u shpreh zëdhënësi i Ministrisë së Zhvillimit. Ndër këto vendet futet edhe Shqipëria, Kosova, Serbia, Tunizia, Maroku dhe Nigeria.
Programi i drejtohet azilkërkuesve që nuk kanë asnjë shans njohjeje nga Gjermania, por edhe atyre refugjatëve që duan të kthehen në atdhe, pas përfundimit të konflikteve.
Që prej fillimit të 2015-ës, 1.2 milionë njerëz kanë shkuar në Gjermani. Megjithatë shumë kërkesa për azil janë refuzuar. Problemet me deportimin janë të shumta, ndaj qeveria federale do që të motivojë njerëzit të largohen vullnetarisht.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.