Qeveria, kontratë të re me Pfizer – Manastirliu: 500 mijë doza do të vijnë në 3 muajt e fundit të këtij viti
Qeveria shqiptare është drejt përfundimit të negociatave për një tjetër kontratë me kompaninë e vaksinave Pfizer, për të sjellë 500 mijë doza vaksine të tjera në vendin tonë”. Gjithçka është bërë me dije nga ministrja e Shëndetësisë dhe Mbrojtjes Sociale, Ogerta Manastirliu, e cila po drejton sesionin e 71-të të Komitetit Rajonal për Europën të OBSH, që po zhvillon punimet në Kopenhagën të Danimarkës.
“Jam e kënaqur të them se jemi duke negociuar dhe përfundojmë se shpejti një kontratë tjetër me kompaninë Pfizer për 500 mijë doza vaksine, të cilat do të mbërrijnë në 3-mujorin e fundit të këtij viti dhe natyrisht do të vijojmë të kemi një qasje proaktive për të rritur mbulesën vaksinale tek grupet e riskut, sidomos tek punonjësit shëndetësor, tek mësuesit dhe gjithashtu të gjithë punonjësit e shërbimeve në administratën publike”.
Qeveria shqiptare nënshkroi kontratën e parë me kompaninë Pfizer në fillim të këtij viti, për sigurimin e 500 mijë dozave, të cilat vijojnë të mbërrijnë në vendin tonë në sasi të ndryshme. Ndërkohë që, në total, si pjesë marrëveshjeve direkte me kompanitë, nga ndihma e Bashkimit Evropian dhe mekanizmi COVAX deri tani kanë mbërritur në vendin tonë 1,982,130 vaksina antiCOVID. Ndërkaq, sipas të dhënave zyrtare nga Ministria e Shëndetësisë dhe Mbrojtjes Sociale, deri në datën 13 shtator rezultojnë të vaksinuar me të 2 dozat e vaksinës 704,626 qytetarë, të cilët përbëjnë 25% të popullsisë ne vend.
Ndërkohë që, nëse do të konsiderojmë vetëm qytetarët mbi 18 vjeç, ku edhe është përqendruar vaksinimit në vendin tonë, atëherë rezulton se janë vaksinuar 32.4% e qytetarëve. Me gjasë, mbërritja e dozave të vaksinës Pfizer do të rrisë numrin e personave të vaksinuar, duke qenë se ajo është edhe një nga vaksinat më të preferuara, për shkak të nivelit të mbrojtjes së marrjes së certifikimit përfundimtar nga Agjencia Amerikane e Barnave CDC.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.