Qeveria me “dietë” në vitin 2021 – U “kursyen” 264 milionë euro. Për çfarë u shpenzua më shumë?
Qeveria ka “kursyer” vitin që kaloi duke shpenzuar rreth 264 milionë euro më pak se planifikimi i bërë. Referuar të dhënave zyrtare të ministrisë së Financave, shpenzimet totale ishin parashikuar në 628.3 miliardë lekë, nga të cilat u përdorën 596.3 miliardë lekë.
Por për çfarë shpenzoi më shumë buxheti i shtetit gjatë 2021-shin? Pjesa më e madhe e parave në dispozicion ka shkuar për shpenzime korrente, ku 83.3 miliardë lekë janë përdorur për pagat e e punonjësve të administratës publike, rreth 35.9 miliardë lekë për interesat e huave të marra, dhe 59.4 miliardë lekë për shpenzime operative dhe të mirëmbajtjes.
Ndërkaq, një fond i konsiderueshëm prej 199.5 miliardë lekësh ka shkuar për skemën e pensioneve, sigurime shëndetësore si dhe shpenzime për kompensimin e pronarëve. 29.1 miliardë lekë janë përdorur për shpenzime sociale, ku përfshihet ndihma ekonomike, pagesa e papunësisë, bonusi i lindjeve si dhe kompensimi për ish të përndjekurit politik. Ndërsa për pushtetin vendor kanë shkuar 29 miliardë lekë.
Sa i takon investimeve, gjatë vitit që lam pas, janë shpenzuar 98.5 miliardë lekë për punë publike. Realizimi është në masën 88 për qind, apo 13.5 miliardë lekë nga sa ishin planifikuar. Nga të gjithë të dhënat, duket se buxheti i shtetit si “kosto” më të lartë ka skemën e sigurimeve shoqërore, kontribut i derdhur sipas niveli të pagave të punonjësve.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.