Qeveria, më shumë fonde për bashkitë – Ndan pjesë nga tatimi i të ardhurave personale, 8 % nga renta
Në kushtet kur pjesa më e madhe e bashkive gjenden në vështirësi financiare dhe kanë mungesë kapacitetesh për të ofruar shërbimet e nevojshme për qytetarët, parashikohet që një pjesë e e tatimit mbi të ardhurat personale që mblidhet nga qeveria qendrore, të shkojë për vendorët me qëllim forcimin e tyre financiar. Kjo lëvizje, e cila ka qenë një kërkesë e hershme edhe e bashkive, parashikohet në planit të veprimit 2020–2022, i cili ka hyrë në fuqi dhe është detyrim për t’u zbatuar nga të gjitha institucionet.
Një ndër pikat që përcakton plani, është rritja e ndarjes së të ardhurave nga taksat kombëtare me bashkitë. Ndarja për të ardhurat personale planifikohet të zbatohet brenda këtij viti dhe do të bëhet përmes një udhëzimi të veçantë i cili do të përcaktojë dhe mënyrën e përllogaritjes së ndarjes midis njësive të vetëqeverisjes vendore të të ardhurave nga tatimi mbi të ardhurat personale.
Po ashtu parashikohet gjithashtu rritja e ndarjes së të ardhurave nga taksa e rentës minerare për bashkitë nga niveli aktual prej 5% në 8%. Nga ana tjetër qeveria parashikon edhe rritje graduale të financimit për transfertën e pakushtëzuar për të akomoduar financimin e funksioneve të reja të transferuara me ligjin për vetëqeverisjen vendore.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.