Qeveria miraton indeksimin e pensioneve – Rriten me 2.7%, për të shmangur efektin e inflacionit, në fuqi prej 1 prillit

Këshilli i Ministrave  me propozim të Ministrisë  së Financave dhe Ekonomisë,  miratoi  në mbledhjen e rradhës  vendimin “’Për indeksimin e pensioneve dhe bazës së vlerësuar”. Rritja e pensioneve për mbi 700 mijë pensionistë vjen e bazuar mbi të dhënat më të fundit të Institutit të statistikave mbi ecurinë e indeksit të çmimeve të konsumit, duke mbajtur kështu pensionet në vlerën reale. Gjithashtu, vendimi ka për qëllim edhe miratimin e koeficientit vjetor të indeksimit “bazës së vlerësuar” për efekt të kalkulimit të masës së pensionit fillestar që caktohet pas hyrjes në fuqi të këtij vendimi.

Bazuar në përllogaritjet e kryera nga INSTAT,  indeksi mesatar vjetor i rritjes së çmimeve të shportës së mallrave të konsumit dhe të shërbimeve të pensionistëve do të jetë +2.7 %. Projektvendimi parashikohet të zbatohet me efekt financiar nga data 01.04.2021, ashtu si edhe në vitet e mëparshme, dhe sipas politikave buxhetore të rritjes së pensioneve të miratuara në buxhetin e vitit 2021. Duke zbatuar këtë koeficient realizohet rritja e të ardhurave mujore nga pensionet për mbi 669 mijë përfitues aktual të pensioneve nga sigurimi i detyrueshëm, trajtimeve financiare, pensioneve suplementare dhe pensioneve të parakohshme si dhe të përfituesve të të ardhurave të barrëlindjes në fshat.

Nga rritja e pensioneve e parashikuar në këtë projektvendim do të përfitojnë rreth 702 944 përfitues, prej të cilëve 688 944 janë përfitues aktual dhe rreth 14 000 llogaritet të jenë përfitues të ardhshëm që do të marrin pension të indeksuar deri në indeksimin e ardhshëm.  Nga totali i përfituesve, 555,442  janë pensione qyteti, rreth 114002 janë pensionistë që marrin pensione fshati dhe rreth 19,500 janë pensione sociale, pensione të parakohshme të ish-ushtarakëve, policëve dhe punonjësve të Gardës, të Shërbimit Informativ të Shtetit, të Policisë së Burgjeve, të Policisë së Mbrojtjes nga Zjarri dhe të Shpëtimit dhe punonjësve të Shërbimit të Kontrollit të Brendshëm në Republikën e Shqipërisë si dhe trajtime të veçanta, të ish-punonjësve të nëntokës, të industrisë ushtarake, ish-pilotëve, ish-ushtarakëve të nëndetëseve, të industrisë së naftës dhe metalurgjisë etj..

Efektet financiare për zbatimin e këtij vendimi, përllogariten në shumën 2,4 miliardë lekë, përballohen nga fondi për politikat e indeksimit të pensioneve, i parashikuar në buxhetin e ISSH të vitit 2021.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.