Qeveria miraton paketën e re fiskale – Ja lista me 22 masat e reja që pritet të ndërmerren
Qeveria e Kosovës ka aprovuar gjatë ditës së sotme paketën e re fiskale me 22 masat e reja. Tashmë kjo paktë me ndryshimet e reja është publikuar në faqen zyrtare të Ministrisë së Financave, por prezantimin e saj më të detajuar e ka bërë kreu i këtij dikasteri, Avdullah Hoti në një konferencë pas mbledhjes së qeverisë.
“Në vazhdimësinë e reformave fiskale të ndërmarra në vitin 2015, Ministria e Financave gjatë vitit 2016 ka punuar gjatë në dizajnimin e politikave të reja fiskale, bazuar gjithmonë në nevojat për ndryshime, të identifikuara nga vetë bizneset. Rrjedhimisht, kemi mbajtur takime të vazhdueshme me komunitetin e bizneseve, qoftë nëpërmjet tryezave të përbashkëta të organizuara, qoftë nëpërmjet vizitave që i kemi realizuar në terren”, ka bërë të ditur ministri i Financave Avdullah Hoti në konferencën e sotme për media.
Ai bëri të ditur se gjatë takimeve me komunitetin e bizneseve, është informuar drejtpërdrejt nga bizneset për efektet pozitive nga implementimi i reformave fiskale të vitit 2015, si dhe për sfidat e tyre sa i përket kushteve të të bërit biznes.
“Në fund të vitit 2016 ne kemi arritur që të konceptojmë një draft të politikave të reja fiskale – Pakon Fiskale 2.0, ku më 14 dhjetor 2016, këtu në Qeveri kemi aprovuar në parim, nismën për masat e përfshira në këtë pako. Me këtë rast është hapur rruga për zhvillimin e fazës së diskutimeve publike me komunitetin e bizneseve dhe palët tjera të interesit për Pakon Fiskale 2.0. Hapja e fazës së diskutimeve publike është shënuar me takimin e organizuar nga Oda Ekonomike e Kosovës, duke vazhduar më pas me diskutimet e hapura publike me përfaqësuesit e bizneseve ku në fokus ka qenë kompleksiteti i disa çështjeve dhe me qëllim të sqarimit në detale të propozimeve nga përfaqësuesit e bizneseve” ka shtuar ministri Hoti.
Ai theksoi se propozimet për politikat e reja fiskale janë prezantuar edhe në Konferencën “Ambienti i Ambientit 2017”, si dhe në takimet tjera të tilla, të organizuara nga Ministria e Tregtisë dhe Industrisë, nëpër rajonet: Gjilan, Prizren, Istog, Mitrovicë.
“Si rezultat i të gjitha takimeve të sipër përmendura, është arritur një konsensus i përbashkët mes Ministrisë së Financave dhe komunitetit të bizneseve për masat e Pakos Fiskale 2.0, ku janë përfshirë 22 masa, të cilat janë paraparë që të implementohen nëpërmjet ndryshimeve, qoftë në aspektin legjislativ apo atë procedural. I gjithë ky angazhim nga Ministria e Financave dhe aktorët tjerë është bërë me qëllim të fuqizimit të sektorit privat, si një nga shtyllat kryesore të zhvillimit ekonomik të vendit” shtoi ministri Hoti.
Për ndryshimet në paketën fiskale, klikoni këtu
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.