Qeveria në ikje e Suedisë është një viktimë e suksesit të saj ekonomik
Shumë pak merita do të marrë qeveria e Suedisë për atë çka do të jetë zgjerimi më i gjatë ekonomik i të paktën katër dekadave të fundit. Sondazhet tregojnë se mbështetja për Social Demokratët në krye ka rënë në rreth 24% dhe ministrja e Financave, Magdalena Andersson ia vë fajin për këtë suksesit të tyre ekonomik.
“Debati politik nuk fokusohet në ato fusha ku po bëjmë mirë. Pikërisht për ato duhet të flisnin”, shprehet ministrja.
Pavarësisht treguesve të shumtë pozitivë të suksesit ekonomik të katër viteve të fundit, votuesit po i kthejnë shpinën partisë që qeveris vendin. Teksa rritja i drejtohet vitit të saj të pestë, shifrat e fundit tregojnë për një rritje vjetore ende mbi 3%. Punësimi është në nivele të larta rekord, ndërsa suficitet e njëpasnjëshme buxhetore e kanë ulur borxhin publik në nivelin më të ulët prej viteve ’70.
Megjithatë ekonomia ka edhe anët e saj të hidhura. Qeveria ka ngritur taksat, ndërsa një valë rekord emigrimi ka rritur konkurrencën në tregun e punës, duke e mbajtur normën e papunësisë mbi 6% dhe duke munduar kështu sistemin e ndihmës sociale.
Studimet tregojnë se populli ka ndryshuar interesat e tij dhe tashmë çështjet më të rëndësishme për ta janë emigracioni, ndjekur nga shëndetësia, integrimi dhe krimet. Kjo është e natyrshme nëse marrim parasysh se Suedia, një vend me vetëm 10 milionë banorë, ka pranuar mbi 500 mijë emigrantë gjatë katër viteve të fundit. Edhe shëndetësia është përkeqësuar, pasi ka njerëz që presin mbi 90 ditë për një operacion apo trajtim të specializuar.
Nëse dikur suedezët ishin vullnetarë për të ngritur taksat, sot ata mendojnë se mund ta menaxhojnë shtetin e mirëqenies sociale pa patur nevojë t’i ngrenë ato.
Partia është tashmë e bindur së duhet të mbajë emigrimin në nivele që i mundësojnë të ruajnë këtë sistem mirëqenieje sociale. Ministrja e ekonomisë shprehet se politikat më të shtrënguara në emigracion janë të pashmangshme.
“Pikëpamja jonë është se kjo është tërësisht e nevojshme, pasi nuk mund të marrim një përgjegjësi të shpërpjesshme krahasuar me vendet e tjera të BE. Duhet të fokusohemi që këta njerëz që fitojnë të drejtën të qëndrojnë në Suedi të bëhen pjesë e shoqërisë sonë: të mësojnë suedisht, të gjejnë strehim, të fillojnë një punë”, u shpreh Andersson.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.