Qeveria rrit numrin e punonjësve me kontratë të përkohshme – Shtohen 237 vende pune
Numri i punonjësve me kontratë pune të përkohshme në administratën qendrore do të rritet me 237 punonjës më shumë, në 1989 punonjës.
Këshilli i Ministrave ka vendosur gjatë mbledhjes së kaluar të ndryshojë numrin e miratuar më parë në buxhetin e shtetit për vitin 2018.
Institucionet që duket se përfitojnë nga shtimi i organikës janë Ministria e Infrastrukturës dhe Energjisë, Ministria e Financave dhe Ekonomisë, Ministria e Arsimit, Ministria e Shëndetësisë, Ministria e Drejtësisë, Ministria e Brendshme, Shërbimi Informativ Shtetëror, Agjencia për Mbështetjen e Shoqërisë Civile dhe disa institucione të tjera qeveritare, përfshi ALUIZNI.
Për këtë të fundit, efektet shtesë financiare për punonjësit e rinj do të përballohen nga të ardhurat e vetë institucionet. Ndërkohë për pjesën tjetër, shpenzimet për punonjësit e rinj do të mbulohen nga shpenzimet korrente të miratuara në buxhet.
Në këtë mënyrë, rritja e organikës së institucioneve qendrore nuk shton efektet financiare për buxhetin e shtetit.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.