Qeveria shqiptare nënshkruan marrëveshjen me SHBA-të për sigurinë e teknologjisë 5G
Qeveria shqiptare ka rënë në një marrëveshje me Shtetet e Bashkuara të Amerikës sa i përket përdorimit së teknologjive 4G dhe 5G.
Në vendimet e Këshillit të Ministrave të datës 11 dhjetor shkruhet :
“Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Infrastrukturës dhe Energjisë, Këshilli i Ministrave
V E N D O S I:
Miratimin, në parim, të memorandumit të mirëkuptimit, ndërmjet Këshillit të Ministrave të Republikës së Shqipërisë dhe qeverisë së Shteteve të Bashkuara të Amerikës, për sigurinë 4G dhe 5G, sipas tekstit që i bashkëlidhet këtij vendimi.”
Teknologjia 5G është kthyer në një objekt global diskutimi pasi shumë shtete e konsiderojnë atë si të rrezikshme, për shkak të shfrytëzimit që mund t’i bëhet të dhënave të përdoruesve nga shtete të huaja. Për këtë arsye Amerika ka përdorur të gjitha mjetet diplomatike për të paralajmëruar rreth këtij rreziku shtetet që ajo i konsideron partnere të saj.
E ngarkuara me punë e ambasadës amerikane në Shqipëri, Leyla Moses-Ones në një konferencë të mbajtur për sfidat e sigurisë në nder të Gjeneralit James Jones u shpreh kështu rreth kësaj teme:
“Kur flitet për infrastrukturën 5G dhe atë kibernetike kritike në Shtetet e Bashkuara dhe në vende aleate të NATO-s siç është Shqipëria, ne nuk mund të jemi më të qartë: siguria nuk mund të kompromentohet apo të shitet. Është jetike të merret në shqyrtim nëse furnizuesit i nënshtrohet kontrollit nga një qeveri e huaj pa një shqyrtim gjyqësor të pavarur, nëse respektohen të drejtat e pronësisë intelektuale, dhe çfarë të kaluare kanë palët shitëse në lidhje me respektimin e shtetit të së drejtës. Në këtë këndvështrim, Shtetet e Bashkuara, Shqipëria dhe aleatët e NATO-s duhet të largohen nga ofrues dhe rrjete furnizmi jo të besueshme të teknologjisë së informacionit dhe komunikimit në ato të besueshme… Liria nuk vjen falas dhe liria nuk është në shitje”.
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.