Qeveria “zhytet” në borxh me bizneset – Rritet fatura për largimet nga puna dhe rimbursimin e TVSH
Vetëm në tre muaj, qeveria ka krijuar 1 miliardë lekë detyrime të prapambetura ndaj bizneseve dhe individëve, duke e çuar faturën totale të borxhit ku përfshihen edhe detyrimet stok në rreth 6.9 miliardë lekë.
Ministria e Financave ka publikuar shifrat për periudhën Prill –Qershor 2019, ku vihet re se peshën më të madhe të detyrimeve të krijuara rishtazi e zënë ato për vepra infrastrukturore apo borxhet e ndërmarrjeve të ujësjellës-kanalizimeve, me 622.7 milionë lekë, apo 1.8 miliardë lekë në total, duke vijuar praktikën e prokurimit të veprave publike pa pasur buxhetin e nevojshëm dhe duke treguar hapur se reforma në sektorin e ujit ka dështuar.
Një pjesë të mirë të borxheve të reja e zënë vendimet gjyqësore që duhet të paguajë buxheti i shtetit, faturë e cila deri në Qershor 2019 rezulton në vlerën e rreth 1.7 miliardë lekëve.
Më shumë se 80 për qind e detyrimeve të Ministrisë së Financave dhe të Ekonomisë kanë të bëjnë me vendime gjyqësore për ish punonjës të Drejtorisë së Përgjithshme të Tatimeve, rreth 329.9 milionë lekë.
Po ashtu, Drejtoria e Përgjithshme e Tatimeve ka akumuluar 69.3 milion lekë detyrime të prapambetura për vendime gjyqësore lidhur me rimbursimin e TVSH deri në Qershor 2019, ndërsa gjatë 3-mujorit të dytë ka krijuar 20.8 milion lekë detyrime të reja.
Viti 2018 u mbyll me një total detyrimesh në rreth 6.2 miliardë lekë, çka tregon se fatura po ndjek trend rritës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.