Qipro optimiste për qëndrim të ashpër të BE-së kundrejt Turqisë

Presidenti qipriot Nikos Anastasiades tha të martën se ishte i bindur se Bashkimi Europian do të merrte një qëndrim më të ashpër ndaj Turqisë në një debat në rritje në lidhje me naftën dhe gazin në det të hapur, i cili po rrezikon gjithashtu bisedimet e zgjerimit të BE. Qipro si anëtare e BE, kërcënoi të hënën se do të bllokonte çdo marrëveshje për të pranuar anëtarë të rinj në Bashkimin Europian, nëse Brukseli nuk forcon qëndrimin e vet drejt Turqisë mbi shpimet në det të hapur në Mesdheun lindor. Qeveria greko-qipriote thotë se shpimi shkel zonën ekskluzive tregtare të Qipros. “Jam optimist se Bashkimi Europian do të japë mesazhe më të forta se ato që kanë dhënë deri më sot, dhe ky është objektivi ynë”, u tha Anastasiades gazetarëve në Nikosia.

Një anije turke është ankoruar në perëndim të Qipros që nga fillimi i majit, duke bërë hapur një debat mbi një zonë të pretenduar nga të dyja shtetet. Gjatë kësaj jave pritet që një tjetër anije turke të niset në një vend në lindje të ishullit. Ministrat e BE do të takohen të martën në Luksemburg për të diskutuar fillimin e negociatave formale të anëtarësimit me Shqipërinë dhe Maqedoninë e Veriut. Por të hënën, diplomatët kombëtarë nga shtetet anëtare nuk arritën në një konsensus mbi një projekt-deklaratë të përbashkët që do të kishte shkruar hapat e ardhshëm drejt zgjerimit, pjesërisht për shkak të kundërshtimeve të Qipros.

I pyetur nëse Nicosia do të bllokonte çdo përfundim të takimit të ministrave të jashtëm në Luksemburg, Anastasiades tha: “Na lejoni që ta trajtojmë këtë siç duhet në bazë të zhvillimeve. Nuk do të arrini objektivat tuaja me deklarata që tingëllojnë si retorika turke.”  Turqia dhe qeveria qipriote e njohur ndërkombëtarisht, kanë mbivendosje të pretendimeve të juridiksionit mbi zonat rreth Qipros, një rajon që mendohet të jetë i pasur me gaz natyror.

Burimi: Reuters

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.