Qiraja financiare – Portofoli arrin në 6.56 miliardë lekë

Portofoli i qirasë financiare arriti vitin e kaluar në vlerën e 6.56 miliardë lekëve. Sipas të dhënave nga Banka e Shqipërisë, ky aktivitet u zgjeruar me rreth 7.5% gjatë vitit 2017.

Qiraja financiare ose lizingu përdoret kryesisht për financimin e blerjes së automjeteve apo linjave të prodhimit. Statistikat tregojnë se më shumë se gjysma e portofolit shkon për blerjen e mjeteve personale të transportit.

Lizingu është forma kryesore e financimit për blerjen e makinave të reja, ndërsa, së fundmi, ka edhe subjekte që kanë nisur të ofrojnë financim për mjetet e përdorura.

Nëse rreth 55% e portofolit të lizingut ka financuar blerjen e automjeteve personale, pjesa e mbetur prej 45% shkon për mjete transporti të biznesit, linja prodhimi dhe, në përmasa të vogla, edhe për pasuri të paluajtshme apo qëllime të tjera.

Aktualisht, janë gjashtë kompani të licencuara që kanë si aktivitet kryesor qiranë financiare. Gjithashtu, licencë për lizing kanë edhe disa banka tregtare, si Credins apo Societe Generale, që me kalimin e kohës kanë preferuar ta shkrijnë aktivitetin e qirasë financiare brenda strukturave të bankës.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.