Qiratë për tërmetin shtyhen pa kufi – Denaj: Lehtësi familjeve për bonuset. Roshi: Absurde, janë caktuar afatet e rindërtimit

Kuvendi ka miratuar shtyrjen e afatit të mbështetjes me qira të familjarëve të mbetura pa strehë nga tërmeti i 26 nëntorit deri në përfundimin e ndërtimit të banesave të reja. Vendimi për shtyrjen u argumentua para deputetëve nga Ministrja e Financave Anila Denaj. Ajo tha se kjo lehtësi ndërmerret për t’u krijuar kushtet familjeve të përfitojnë qiranë pa aplikuar përsëri duke paraqitur kërkesa e dokumente.

Ndërkohë që me nota kritike lidhur me këtë vendim u shpreh Deputeti I Opozitës Parlamentare Artur Roshi. Ai tha se shtyrja pa limit e afatit për përfitimin e qirave nuk ka kuptim në çastin kur Qeveria ka çelur tenderët e ka përcaktuar afatet për banesat e reja. Kjo sipas tij, është një tregues i qartë i dështimit të Qeverisë në strehimin e njerëzve, ndërkohë që kostot do të përballohen nga qytetarët shqiptarë.

Sipas përfaqësuesve të Qeverisë, miratimi i këtij akti është domosdoshmëri, nisur nga situate aktuale e shkaktuar nga Covid 19, e cila vështirëson sigurimin e dokumentacionit sipas Ligjit për Strehimin Social.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.