Qukës-Qafë Plloçë – Qeveria kërkon konsulent për auditimin e rrugës
Një nga projektet e lakuara edhe gjatë qeverisjes Berisha, por edhe gjatë asaj Rama, është ajo e segmentit Qukës-Qafë Plloçë pjesë e korridorit Tiranë-Korçë.
Autoriteti Rrugor Shqiptar tashmë po kërkon një konsulent, i cili do të jetë pjesë e zbatimit të projektit, por këtë herë për ta audituar atë.
Në një njoftim të bërë nga ky insitucion dhe të shpallur edhe nga Ministria e Financae jepen edhe detajet.
“Qeveria shqiptare ka përfituar një financim nga Banka Islamike për Zhvillim për ndërtimin e “Qukës-Qafë Plloçë” dhe ka si synim të përdorë një pjesë të këtyre parave në zërin e Shërbimeve për konsulencë dhe saktësisht për Auditimin Financiar të projektit. Objektivi final i kësaj detyre është që të vlerësojë të dhënat dhe raportet finale financiare të projektit, shpenzimet dhe përdorimin e fondeve në përputhje me marrëveshjen e dakordësuar”, thuhet në njoftimin zyrtar.
Vlera totale e projektit Qukës-Qafë Pllocë është parashikuar 150 milionë dollarë nga të cilat 125 milionë janë siguruar nga Banka Islamike për Zhvillim dhe 25 milionë te tjerë nga Fondi Saudit për Zhvillim. Paketa e financimit është mbyllur qysh në vitin 2014.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.