Qytetarët “garantohen” nga zjarri e tërmetet 8-mujori/ Paguajnë 10.9 milionë euro për t’u siguruar
Zjarret e shumta në të cilat është përfshirë vendi gjatë këtij viti por edhe tërmetet e vitit 2019, duket se kanë rritur deri diku ndërgjegjsimin e qytetarëve për tu siguruar dhe për t’ia transferuar riskun kompanive të sigurimit. Sipas të dhënave të Autoritetit të Mbikqyrjes Financiare, qytetarët shqiptarë kanë paguar afro 1.3 miliardë lekë apo 10.9 milionë euro përgjatë përiudhës Janar-Gusht 2021 për sigurimin nga zjarri dhe forcat e natyrës me një rritje prej 44 për qind krahasuar me të njëjtën periudhë të një viti më parë, ku u paguan rreth 920 milionë lekë.
Sigurimi nga zjarret dhe forcat e natyrës zë një peshë të rëndësishme në tortën e sigurimeve, ku renditet pas siguracionit të përgjegjësisë motorike për palët e treta, i cili është i detyrueshëm. Nga ana tjetër, sa i takon dëmeve të paguara nga kompanitë për sigurimin nga zjarri dhe forcat e natyrës, duket se kanë pasur rënie gjatë këtij vitit, për shkak se pjesa më e madhe është përqendruar në 2020-ën ku janë shlyer të prekurit nga tërmeti që kishin një kontratë sigurimi, duke bërë që shifra të jetë shumë më e lartë se e një viti të zakonshëm . Në Janar-Gusht 2021, janë paguar 654 milionë lekë dëme nga 2.3 miliardë lekë në vitin pararadhës, me një rënie prej 71.7 për qind.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.