Qytetarët në Kosovë shpenzojnë 150 milionë euro në vit për shërbime shëndetësore jashtë vendit
Qytetarët e Kosovës shpenzojnë rreth 150 milionë euro në vit për të ndjekur shërbime mjekësore jashtë vendit.
Shifrat vijnë nga kryetari i Federatës Sindikale të Shëndetësisë Blerim Syla, duke u bazuar në statistikat e Bankës Botërore. Arsyeja pse qytetarët zgjedhin të shkojnë jashtë vendit, sipas tij, është se shërbimet mjekësore në vend janë shumë të mangëta.
“Konsiderojmë se për shkak të politikave që i kemi dhe mos marrjes së shërbimeve shëndetësore, shpenzohen 120 deri 150 milionë euro në vit nga qytetarët në spitale private (jashtë Kosovës). Sikur këto të holla të investoheshin brenda vendit, shërbimet do të ishin të mira. Këto shifra i ka publikuar Banka Botërore”, tha Syla.
Por ajo që duket më shqetësuese është se përveç rasteve kur individët i drejtohen vetë kërkimit të një shërbimi jashtë vendit, një pjesë e mirë e qytetarëve referohen për t’u trajtuar jashtë shtetit nga institucionet e Kosovës.
Gjatë vitit 2016, Ministria e Shëndetësisë në Kosovë ka ndarë rreth 6 milionë euro për programin e dërgimit të pacientëve jashtë institucioneve publike shëndetësore.
Duke folur për “Radio Evropa e Lirë”, zyrtari për informim Lulzim Uka thas se ka patur 1958 aplikime për shërbime shëndetësore jashtë vendit. Nga këto aplikime kanë mundur të përfitojnë 1100 pacientë, ndërsa shpenzimet për mbulimin e këtyre rasteve u kanë kushtuar buxhetit të shtetit 8 milionë euro.
“Buxheti ka qenë 6 milionë euro, derisa pjesa tjetër është bartur si borxh për këtë vit, gjë që dëshmon se ky buxhet nuk mjafton. Ministria e Shëndetësisë në baza ditore po punon në ngritjen e infrastrukturës në mënyrë që të ketë sa më pak nevoja për trajtim jashtë vendit”, u shpreh Uka.
Në anën tjetër, zyrtari për informim në Qendrën Klinike Universitare të Kosovës, Shpend Fazliu, ka thënë se rastet që nuk trajtohen brenda kësaj qendre, si institucion terciar referent për tërë Kosovën, referohen për trajtim jashtë vendit.
“Në kuadër të secilës klinikë brenda Qendrës Klinike Universitare të Kosovës, ekziston konsiliumi prej tre anëtarësh dhe drejtorit të klinikës, që shqyrtojnë sëmundjet që duhet trajtuar jashtë institucioneve publike shëndetësore. Sëmundjet ndërlidhen kryesisht me leukeminë, por edhe me transplantet që nuk mund të kryhen (këtu)”, ka thënë Fazliu.
Sidoqoftë, sipas zyrtarëve të Ministrisë së Shëndetësisë, interesimi më i madh për trajtime jashtë vendit, është në citostatik me 187 aplikime, brakiterapi me 34, kardiologji me 637 aplikime.
Po ashtu, interesim për trajtim jashtë ka edhe për kardiokirurgji me 36 , kirurgji me 45, leukemi me 35, nefrologji me 23 aplikime, neurologji me 49, oftalmologji me 341, onkologji me 12, ORL me 42, ortopedi me 299, pediatri me 132 dhe të tjera, ku përfshihen 21 pacientë që kanë aplikuar për trajtim jashtë Kosovës.
Burimi: Radio Evropa e Lirë
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.