Qytetet europiane që u ka ardhur turizmi në majë të hundës

Banorët e këtyre vendeve paralajmërojnë se destinacionet kryesore për pushime në Europë janë duke u shkatërruar nga turma të mëdha, të cilat krijojnë shumë zhurma, ndotin mjedisin dhe rrisin çmimet e qirave.

Turizmi po shfaq këtë verë efekte negative në qyete si Barcelona, Venecia, Dubrovniku dhe Praga, ku numri i vizitorëve është rritur falë shtimit të linjave të lira ajrore, si edhe shërbimeve si Airbnb.

Ekonomitë vendase mund të jenë rritur, por banorët thonë se lagjet janë duke u shndërruar në parqe të stilit Disney.

“Disa destinacione europiane po vuajnë peshën e turizmit të tepërt. Është e qartë që duhen strategji për të përballuar kërkesat e mëdha”, thonë analistët e Euromonitor International.

Ja disa nga masat që po marrin qytetet e ndryshme për të përballuar fluksin:

Venecia

Turistëve u është kërkuar të mos lënë mbeturina, të lënë drynë dashurie, të veshin rroba banje në qytet, apo të mos hanë në shkallët e kryeveprave arkitekturore të qytetit.

Turizmi i shtuar ka detyruar mbi dy të tretat e popullsisë vendase të largohen në 50 vitet e fundit.

Barcelona

Vitin e kaluar Barcelona priti 8 milionë turistë. Banorët e disa lagjeve si Barceloneta janë ngritur në protesta për t’u kujtuar turistëve që kjo zonë është shtëpia e tyre.

Së fundmi, këshilli bashkiak ka miratuar rregulla të reja për të zbogëluar ndërtimin e hoteleve dhe ka vendosur çmime dysheme për shtëpitë me qira. Autoritetet kanë vendosur të përdorin të ardhurat nga taksa e turizmit në shërbime për qytetarët, në vend që të promovojnë më shumë turizëm.

Ndërkohë, qeveria mbron industrinë e turizmit, pasi ky sektor kontribuon në mbi 14% të PBB të Spanjës.

Dubrovnik

Në vitin 2016, qyteti pati një rritje prej 10% të vizitorëve, si pasojë e një roli që qyteti ka në serialin Game of Thrones. Megjithatë, duket se qyteti e kishte arritur limitin e tij fizik. Së fundmi numri i anijeve që lundrojnë drejt qytetit do të limitohet.

Praga

Praga është ndër qytetet më të vizituara të kontinentit, me mbi 5.8 milionë vizita në vitin e shkuar. Kultura e birrës e qytetit e bën një destinacion popullor për festa beqarësh dhe zënkash nëpër lokale.

Kjo gjë ka shkaktuar shumë shqetësime mes banorëve vendas. Në Maj, policia krijoi një skuadër të re “anti konflikt”, e cila patrullon zonat më të mbushura të qytetit, duke u kërkuar turistëve të respektojnë “kohën zyrtare të qetësisë natën”, e cila nis në orën 22:00.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.