Qytetet më të shtrenjta në 2018 – Singapori mban vendin e parë, në listë dominojnë qytetet europiane

Singapori ka qëndruar qyteti më i shtrenjtë në botë për të 5-tin vit radhazi, në raportin e fundit të “Kostos Botërore të Jetesës 2018”, ndërsa Parisi dhe Zyrihu kanë marrë të njëjtin rezultat, në vend të 2-të.  Renditja vjetore e “The Economist Intelligence Unit”  krahason çmimet e mbi 150 artikujve në 133 qytete në të gjithë botën,  përfshirë bukën,  verën,  cigaret dhe karburantin.  Ky vlerësim synon t’i vijë në ndihmë menaxherëve që të llogarisin një nivel të drejtë të pagave kur zhvendosin punonjësit jashtë vendit.

Qytetet europianë si;  Parisi, Zyrihu, Gjeneva, Oslo dhe Kopenhageni, kanë vazhduar të dominojnë listën edhe për vitin 2018.  Oslo, ka patur ndryshimin më të madh në renditje, duke u ngjitur me 6 pozicione dhe renditur në vend të 5-të në listë.  Nga ana tjetër Tokjo ka humbur 7 vende nga viti i kaluar, duke dalë nga 10-shja kryesore, ndërsa Hong Kong-u,  që ishte qyteti i dytë më i shtrenjtë, ka rënë në vend të katërt.

“Luhatjet në valutë vazhdojnë të jenë shkaku kryesor në ndryshimet e renditjeve”, shkruhet në raport.  Dollari ka rënë kundër të gjithë valutave të vendeve të G-10-ës, ndërsa euro është rritur me më shumë se 14%.  Parisi është vendi i vetëm i Eurozonës në 10-shen e parë, pavarësisht rritjes së euros.  Nga ana tjetër,  kryeqytetet e Sirisë dhe Venezuelës rezultuan si vendet më të lira për këtë vit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.