Rajoni, me turizëm të unifikuar – Skema e re e granteve të RCC synon të sjellë një ofertë të përbashkët
Këshilli i Bashkëpunimit Rajonal ( RCC ) ka njoftuar nisjen e skemës së granteve për të zhvilluar turizmin në vendet e Ballkanit Perëndimor. Kjo skemë kap vlerën e 1.62 milionë eurove dhe ka për qëllim të përmirësojë infrastrukturën dhe cilësinë e shërbimeve në rajon e sidomos turizmin aventurier.
Skema përfshin të paktën 30 grante, me një vlerë deri në 54 mijë euro secili. Implementimi i këtyre granteve do të bëhet përgjatë një periudhe 3-vjeçare.
“Me këtë skemë grantesh, Këshilli i Bashkëpunimit Rajonal do t`i mundësojë ekonomive publike dhe private në vendet e Ballkanit Perëndimor që të implementojnë ndërhyrjet e nevojshme në qendrat turistike dhe të bëhet më tërheqëse për turistët e huaj. Me fjalë të tjera, ne do të ndihmojmë në ndërtimin e një turizmi të përbashkët të rajonit, gjë që do të çojë në më shumë vizitorë në këto vende, si dhe do të zgjasë në kohë qëndrimin e tyre në rajon, duke qenë se pritet të ketë më shumë vende për t`u vizituar dhe guida të unifikuara”, deklaroi Goran Svilanovic, Sekretar i Përgjithshëm i Këshillit të Bashkëpunim Rajonal.
Skema e granteve është pjesë e një projekti më të gjerë të Bashkimit Europian, që kap vlerën e 5 milionë eurove në total.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.