Rama: Aeroporti i Kukësit, 300 mijë pasagjerë në vit! Punimet nisin për pak muaj

Aeroporti i Kukësit parashikohet që të ketë një lëvizje vjetore prej 300 mijë pasagjerësh në vit. Kjo shifër u bë publike nga kryeministri Edi Rama gjatë takimit me banorë të Shishtavecit në Kukës. Në fjalën e tij, kryeministri tha se punimet për vënien në funksion të aeroportit do të nisin pas pak muajsh. “Unë besoj shumë që në këtë zonë, ne do të shohim modelet e para të zhvillimit të turizmit malor edhe për një arsye tjetër, sepse këtu në Kukës, besoj në fillim të vitit të ardhshëm do të nisë ndërtimi i aeroportit.

Aeroporti ekzistues do të transformohet tërësisht në një aeroport të standardeve ndërkombëtare, për fluturimet me çmime të ulëta. Studimi që ne kemi bërë me ekspertë të huaj na ka inkurajuar shumë dhe mua më ka entuziazmuar shumë, sepse të gjitha analizat e bëra sipas metodave profesionale të parashikimit për suksesin e një biznesi, tregojnë se aeroporti i Kukësit do të lëvizë në një mesatare prej 300 000 udhëtarësh në vit.

Imagjinojeni vetë se çdo të thotë që 300 000 njerëz të lëvizin përmes Kukësit, për të fluturuar jashtë vendit, apo për të ardhur nga jashtë vendit këtu” tha Rama.

Shishtaveci është pjesë e Programit të 100 Fshatrave.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.