Rama: Aeroporti i Vlorës do jetë një vlerë e shtuar, po shkojmë drejt finalizimit të projektit
Në konferencën për mediat me drejtorin e “Turkish Airlines” kryeministri Rama ka folur edhe për aeroportin rajonal të Vlorës, i cili sipas tij përbën një objektiv për zhvillimin e mëtejshëm ekonomik, si edhe për nxitjen e mëtejshme të turizmit.
“Puna vazhdon, edhe në këtë rast me mbështetjen e Erdogan dhe konsorciumit të sprovuar që do të ndërtojë aeroportin e tretë të Stambollit. Edhe ne do të jemi në momentin kur do të bëjmë të njëjtën gjë ku do shprehim vullnetin për të çuar realizimin e projekteve që kërkojnë kohën e tyre, projekte që po shkojnë drejt finalizimit. Aeroporti i Vlorës do të jetë një vlerë e shtuar.”
I pyetur nga TV SCAN se cili do të jetë numri i të punësuarve nga këto projekte, Rama pohoi se:
“Unë besoj se në një kohë të arsyeshme prej maksimumi 90 ditësh, ne do të paraqesim të gjithë pasqyrën e plotë të kësaj ambicie të materializuar në detaje. Si do të jetë dhe çfarë do te bëje fillimisht, si do të zgjerohet vit pas viti, sa të punësuar do të ketë, si dhe sa do të jetë rritja progresive nga linja ajrore shqiptare.”
Rama foli edhe për vështirësitë në hyrjen e kompanive low cost në vend.
“Jemi te vetëdijshëm për shkak të pengesave të shkuara, trashëguam një kontrate koncesionare problematike. Pavarësisht rinegociimeve për aeroportin e Rinasit, me të drejtë pasagjerët janë të pa lumtur me çmimet që rrjedhin nga kjo kontratë. Sigurisht nga kjo kontratë hyrja e kompanive low cost ka qenë më e vështirë se ç’duhet të ishte. Me aeroportin e ri të Vlorës dhe me aeroportin e Sarandës edhe në këtë rrafsh do kemi normalizim” tha Rama.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.