Rama i përgjigjet LSI-së – “Së shpejti rezultate nga Vetting-u, rrisim 40% pagat për mësuesit”
Gjatë pasdites të së Hënës, kryeministri, Edi Rama, i është përgjigjur nga foltorja e Kuvendit, 19 pyetjeve të drejtuara nga LSI, mbi pikat kryesore të qeverisjes për katër vitet e ardhshme. Rama tha se, falë përmirësimit të ekonomisë parashikohet rritje e pagave me 40% për infermierët e mësuesit. Transformim, sipas tij, do të pësojë edhe ndihma ekonomike dhe asistenca shëndetësore për qytetarët. Lidhur me reformën në administratë Rama tha se nuk duhet të trembet pjesa e shëndetshme e saj, pasi ajo do të prekë vetëm pjesën e kalbur.
“Sa i përket largimeve nga puna, mos u shqetësoni. Administrata për ne është një aset. Padiskutim që pjesa e shëndetshme e adminsitartës është më e madhe se ajo e kalbur dhe padiskutim që në të gjithë rikonstruksionin tërësor të mekanizmave qeverisës do të ketë një vëmendje të posaçme për të ruajtur çdo aset me vlerë në administratën tonë, qoftë në shërbimin civil, qoftë në administratën shtetërore që funksionon me kodi pune”, u shpreh kryeministri.
Lidhur me intergrimin në Bashkimin Evropian Rama theksoi se tashmë hapja e negociatave nuk është në dorë të Shqipërisë, ndërkohë që nënvizoi se shumë shpejt do të ketë rezultate konkrete nga Vetting-u.
Në përgjigjet ndaj deputeteëve të LSI-së, nuk munguan as ironitë nga ana e Kryeministrit, i cili gjithsesi theksoi se partia e tij nuk është bërë pishman për bashkëqeverisjen 4 vjeçare.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.