Rama inspekton ndërtimin e fiderave të rinj: “Në 7 vite kemi bërë revolucion, ndryshim rrënjësor i sektorit energjetik”

Kryeministri, Edi Rama, ka inspektuar punimet në nënstacionin elektrik në Tiranë, ku u njoh nga afër me ecurinë e instalimit të fiderave të rinj, që pritet jo vetëm të sjellin cilësi por edhe të reduktojnë humbjet. Kryeministri tha se ajo që ka ndodhur këtu është një revolucion pasi teknoligjia e trashëguar ishte e viteve 70. Ndërsa ministrja Belinda Balluku, tha se ky investim shton kapacitetet dhe u realizua në bashkëpunim me Bankën Botërore dhe ul humbjet në rrjet.

“Në 2013, humbjet në rrjet kanë qenë 45 përqind, ndërsa tani e kemi 22 për qind.Janë reduktuar humbjet në rrjet. Duam të arrijmë tek niveli që donim, 16 përqind të humbjes në rrjet. Pajisjet e reja komandohen online.” – u shpreh ministrja.

Ndërkohë kryeministri Rama u shpreh se ky investim është një revolucion në këtë sektor:

“Ky është një revolucion. Në 7 vjet janë bërë më shumë se në dekada të tëra. Janë kantjere për të zëvendësuar rrjete të furnizimit me ujë të viteve 1960, 1970, 1980 etj. Në ato rrjete nuk ishte bërë investim. Nuk i kemi bërë më parë se kishim barrë të madhe borxhesh. Nuk ka pasur më parë asnjë strategji për t’i bërë hap pas hapi së paku.”

Kryeministri në fjalën e tij tha se përveç investimeve në sektorin energjitik, në 7 vite qeveria ka zhvilluar një investim të madh në rrjetin e ujësjellësave që gjithashtu ishte shumë i vjetër.

Arbër Hitaj / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.