Rama kërkesë Kuvendit: Seanca e jashtëzakonshme të mbahet të hënën më 22 Maj. Ja çfarë do të përmbajë rendi i ditës
Publikohet kërkesa që kryeministri Rama i ka bërë Kuvendit për mbajtjen e seancës së jashtëzakonshme, pas vendimit për shpërndarjen e tij, si dhe është publikuar rendi i ditës për këtë seancë. Në një njoftim të publikuar pak minuta më parë nga Kuvendi thuhet: “Bazuar në nenin 74 të Kushtetutës dhe në nenin 42 të Rregullores së Kuvendit, Kryeministri i Republikës së Shqipërisë z. Edi Rama, i ka drejtuar Kuvendit një kërkesë të motivuar me shkrim për thirrjen e Kuvendit në sesion të jashtëzakonshëm. Kërkesa ka përcaktuar që thirrja e Kuvendit në sesion të jashtëzakonshëm të zhvillohet ditën e hënë, më datë 22 maj 2017, në orën 18.00”, thuhet në njoftimin e Kuvendit.
Sipas Kuvendit, rendi i ditës do të ketë përmbajtje: “Rendi i ditës i seancës plenare do të përmbajë diskutimin dhe votimin e çështjeve për vënien në zbatim të Marrëveshjes Politike të datës 18 maj 2017, lidhur me:
-Votimin e dekreteve të Presidentit të Republikës për lirim dhe emërim të zëvendëskryeministrit dhe të 6 ministrave;
-Shqyrtimin dhe miratimin e paketës ligjore që ka lidhje me reformën zgjedhore;
-Miratimin e anëtarëve të pakicës parlamentare në 3 komisionet ad hoc të vettingut, si dhe caktimin e zëvendësuesve;
-Zgjedhjen e Kryetarit dhe një anëtari të KQZ-së.
Në përputhje me Rregulloren e Kuvendit dhe afatet e parashikuara në të, Kryetari i Kuvendit do të nxjerrë urdhrin për mbledhjen e Kuvendit në sesion të jashtëzakonshëm dhe do të publikojë rendin e ditës”, thyhet në njoftim.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.