Rama komenton “JO-në” e negociatave: ‘’Vazhdojmë përpjekjet drejt BE-së, refuzimi nga përplasja e brendshme midis Francës dhe Gjermanisë”
Kryeministri Rama ka dalë në një konferencë për menjëherë pas deklaratave në Këshillin Europian dhe vendimit të shteteve anëtare për të shtyrë sërish hapjen e negociatave me Unionin.
“Kemi bërë përpjekje maksimale për të marrë vetëm atë që meritojmë. Që e meritonim nuk e kam thënë vetëm unë, por me shkrim vetë Komisioni Europian dhe mbështetjes së madhe që keni dëgjuar nga kryeministrat europianë dhe kancelarja e Gjermanisë.”
Sipas tij refuzimi ka ardhur nga një përplasje e madhe konceptuale që Gjermania dhe Franca kanë mbi temën e zgjerimit:
“Nëse duam ta shohim në sy të vërtetën, është ajo që kam thënë prej shumë kohësh. Ka pasur përplasje mes Francës dhe Gjermanisë dhe frontit që ishte për një PO të qartë. Franca nuk pranon të vazhdohet me të njëjtin proces, kërkon një reformim të brendshëm të BE-së dhe transformim të procesit të integrimit.”
Sipas tij Shqipëria i ka kryer detyrat e saj dhe ka kryer reforma të mëdha që nuk i ka kryer asnjë vend tjetër në rajon:
“Jo azilantët jo probleme të tjera këto janë bishta. Kemi marrë vetëm një refuzim, por asgjë më shumë se kaq. Kemi bërë një reformë që nuk I është kërkuar asnjë vendi tjetër në rajon, si procesi I Vettingut dhe reforma në drejtësi. E kemi bërë për vendin tonë sigurisht dhe të ardhmen e fëmijëve tanë.
Më tej në fjalimin e tij kryeministri tha se procesi do të vazhdojë dhe BE-ja ngelet e vetmja perspektivë për Shqipërinë, ku sipas tij procesi i gjatë transformimit bëhet për një demokraci të brendshme funksionale në vendin tonë:
“Procesi I transformimit është një proces I transformimit të brendshëm, që do të thotë një përputhje e legjislacionit dhe ekonomisë me vendet e tjera të Bashkimit Europian. Esenciale të vazhdojmë rrugën që kemi nisur, përpjekjet që kemi bërë dhe të vazhdojmë ndërtimin e Shqipërisë europiane këtu në vendin tonë. Këshilli ishte pa tekst, nuk ka asgjë të shkruar rreth refuzimit të negociatave. Është një përplasje e madhe për të ardhmen e Bashkimit Europian.
Shqipëria Europiane është e vetmja alternativë, është testament në këtë vend dhe i vetmi detyrim i madh që i kemi gjeneratave në të ardhmen” – tha kreu i ekzekutivit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.