Rama: Mbyllje deri në 1 vit për lokalet që tregtojnë alkool për të rinjtë nën 18 vjeç
Të gjithë lokalet që do të tregtojnë alkool për djemtë dhe vajzat nën 18 vjeç do të përballen me bllokim të aktivitetit. Deklarata ka ardhur nga kryeministri, Edi Rama, gjatë një takimi me të rinjtë e zonës së Laprakës. Sipas tij, ndaj tyre do të merren masa drastike, të cilat janë ende në diskutim e sipër.
“Jemi duke diskutuar edhe një masë tjetër që ka të bëjë me alkoolin. Jemi duke punuar që të shkojë një mesazh shumë i qartë për të gjithë lokalet që tregtojnë alkool që në rast se kapet një lokal që i tregton alkool një vajze apo një djali apo një grupi të rinjsh nën moshën 18 vjeç, do të merren masa drastike ndaj lokalit deri mbyllje për 1 vit në rast të përsëritur”, tha Rama.
Ndërkohë, shtoi se po diskutohet masa që do të merret kur kjo ndodh për herë të parë, e cila sipas tij luhatet midis 3 dhe 6 muaj mbyllje të lokaleve. Sipas Ramës, tregtimi i alkoolit nga lokalet për këta të rinj do të dënohet deri në masa ekstreme duke nisur nga 1 janari I vitit të ardhshëm.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.