Rama me kryeministrin kinez – Sot dhe nesër samiti i Kinës me Europën Juglindore. A do të flitet për Rinasin?

Kryeministri Rama do të jetë sonte në mbrëmje në Dubrovnik në kuadër të samitit të 8-të mes Kinës dhe vendeve të Europës jug-lindore.

Samiti i këtij viti do të trajtojnë investimet kineze në këtë rajon në kuadër të iniciativës 16+1 në datat 11 dhe 12 prill.

Sot në mbrëmje do të mbahet vetëm darka e mirëseardhjes mes kryeministrit kroat, atij kinez si dhe kryeministrave të vendeve pjesëmarrëse, mes të cilëve do të jetë edhe Edi Rama.

Ende nuk dihet nëse pjesë e bisedës mes kryeministrit kinez dhe atij shqiptar do të jetë edhe ajo e koncesionit të Aeroportit të Rinasit, që menaxhohet nga një kompani me aksione kineze.

Pas ngjarjes së 9 prillit, qeveria shqiptare është treguar shumë e ashpër me koncesionarin në fjalë, duke e akuzuar drejtpërdrejtë si përgjegjësen kryesore.

Ndërkohë, në Kroaci, të Premten në mëngjes do të nisë punimet forumi i biznesit mes Kinës dhe vendeve të Europës juglindore. Rreth orës 11 do të nisë seanca plenare mes vendeve pjesëmarrëse dhe parashikohet që rreth orës 12.30 të nënshkruhen marrëveshjet dypalëshe mes vendeve.

Kujtojmë se, Shqipëria është i vetmi vend në rajon ku Kina ka pak ose pothuajse aspak investime, ndërkohë që përplasja me kompaninë që menaxhon aeroportin “Nënë Tereza” mund t`i ftohë edhe më shumë këto marrëdhënie.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.