Rama në Finiq: Në të gjithë vendin dhamë 130 mijë leje legalizimi. Do japim titujt e pronësisë së tokës për çdo familje

“Në 2 vite e gjysmë ne kemi arritur të bëjmë 130 mijë legalizime, ndërkohë që në 8 vite qeveria e shkuar bëri 21 mijë legalizime, 80 për qind e tyre biznese”. Kështu është shprehur, kryeministri Rama në një takim me banorët për ndarjen e lejeve të legalizimit në Bashkinë e Finiqit, ku ndër të tjera ai pohoi se në këtë bashki në 2 vite e gjysmë janë bërë 300 legalizime.

“Jam i kënaqur që jam këtu sot sepse kjo e është një zonë që për shumë vite njerëzit dhe problemet e tyre u lanë në harresë. Në 8 vite qeveria e vjetër bëri 21 mijë legalizime, mbi 80 për qind ishin biznese dhe kryesisht në hapësirat publike, në zonat e mbrojtura, në parqe, në oborre shkollash dhe spitalesh. Në 8 vite këtu janë bërë vetëm 6 legalizime, katër klube, një karburant dhe një shtëpi. Ne kemi arritur deri më tani në 130 mijë legalizime, 93 për qind janë shtëpi të legalizuara, shtëpi të nderuara me mund  dhe sakrificë. Në 2 vite e gjysmë që ne punojmë për këtë proces, këtu arrijmë në 300 legalizime, sot pjesa më e madhe shtëpi. Do mbarojmë procesin e legalizimit deri sa shtëpia e fundit të ketë marrë lejen. Do çojmë përpara regjistrimin e tokave dhe do të japin titullin e pronësisë mbi tokën për çdo familjeje”, tha Rama.

Kryeministri tha gjithashtu se kjo leje bëhet një titull pronësie që është një kapital i gjallë pasurie për çdo person.

“Kur kjo leje bëhet një titull pronësie, ky është një kapital i gjallë pasurie. Një person mund të marrë kredi për të hapur një biznes të vogël, për të zgjeruar fermën. Për ne ky proces legalizimesh është një proces që njerëzit të ndjehen të qetë dhe sigurisht është një proces që t’i japë një tjetër shtytje ekonomisë së vendit”, u shpreh kryeministri Rama.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.