Rama takim me sipërmarrësit: T’i luftojmë së bashku “grabitqarët” dhe “parazitët” në administratën publike
Në një takim të zhvilluar paraditen e sotme me sipërmarrësit, Kryeministri Rama bëri thirrje që të bashkëpunohet me qeverinë, kundër “grabitqarëve” në administratë, me qëllim që të formalizohet gjithnjë e më shumë ekonomia.
“Sa shumë “grabitqarë” dhe “parazitë” ka në administratën shtetërore, duhet t’i luftojmë së bashku. Është e mundur që qeveria t’i luftojë edhe pa ju, por do të kërkojë shumë kohë dhe do të krijojë shumë plagë në trupin tuaj, sepse ata do të vazhdojnë të shqyejnë të çjerrin, të dëmtojnë nëse ja jepni këtë mundësi. Ju të na vini në provë dhe ta vini në provë këtë urë te re me ministren e Shtetin për Mbrojtjen e Sipërmarrjes. Kemi pasur debate nëse do të ishte ministria e Sipërmarrjes apo për Mbrojtjen e Sipërmarrjes, Ministria e Shtetit është në qeveri për t’iu mbrojtur. Ne në fund të ditës jemi të vetëdijshëm që Shqipërinë mund ta ndërtojmë në bashkëpunim me ju, pa lënë jashtë vëmendjes rolin e pazëvendësueshëm të investitorëve të huaj. Ne kemi në Shqipëri sipërmarrës që kanë mundësitë financiare, që kanë mundësitë të strukturoren dhe programohen ndryshe, që të injektojë në ekonominë tonë shumë financime, nëse i krijohen mundësitë”, u shpreh Rama.
Kreu i kabinetit qeveritar foli edhe për reduktimin drastik të dokumenteve që sjell, sipas tij një shtysë për çlirimin e sipërmarrjes.
“Ne jemi të bindur që në një proces që kemi nisur, si reduktimi drastik i burokracive, të dokumenteve dhe i gjithë ky reduktim do të sjellë një tjetër shtysë për çlirimin e sipërmarrjes dhe për t’i lënë të merren me gjërat që duhen. Të bëni propozimet tuaja se çfarë licencash dhe dokumentesh duhen, në marrëdhëniet tuaja me tatimet, doganën, kur merrnin pjesë në gara. Nuk mendoj se është e denje qe ju të zgjidhni rrugën e shkurtër, që të bëheni palë me të korruptuarit dhe korruptorët në rrugën e qeverisjes. Të japim nxitje për sipërmarrjen, qe secili prej jush të bëhet pale në luftën kundër informalitetit, pasi janë dy pjesë shumë të lidhura me njëra tjetrën që kondicjonojnë edhe suksesin tuaj. Te ulim së bashku informalitetin që e gërryen sipërmarrjen e madhe, e cila tashmë është strukturuar. Keni bërë progres, por është i pamjaftueshëm. Kemi një teatër tek prokurimet. Duhet strukturim tek shumëçka tjetër që lidhet me mënyrën se si zhvillohet marrëdhënia e sipërmarrjes me shtetin”, u shpreh Rama.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.