Rama takon Pence: SHBA interes për të forcuar bashkëpunimin me vendet e rajonit
Gjatë Samitit të Kartës së Adriatikut Zv.presidenti Mike Pence ka zhvilluar një takim me kryeministrin Edi Rama. Ky i fundit në “Facebook” ka publikuar një video ku shfaqet duke i shtrënguar duart me numrin dy të Shtëpisë së Bardhë.
Komenti me të cilin Rama ka shoqëruar videon është: “Në Mal të Zi me zv.Presidentin e SHBA, Mike Pence, dhe liderët e rajonit tonë për Samitin e Kartës së Adriatikut. Zv.shefi i Shtëpisë së Bardhë nënvizoi fort, interesin e Shteteve të Bashkuara për të forcuar bashkëpunimin me vendet e rajonit, si edhe domosdoshmërinë për të rritur ndërveprimin mes SHBA e vendeve të rajonit e po ashtu mes vetë vendeve të rajonit, në funksion të përballimit me sukses të sfidave të sigurisë, paqes e prosperitetit, në rajon e në Europë”.
Sipas Ramës takimet bilaterale me Zv.presidentin Pence, si edhe me liderët e tjerë të rajonit, patën rëndësinë e tyre të posaçme për rikonfirmimin e vullnetit për të ecur më tej, të gjithë së bashku, në mbrojtje të interesave strategjike të popujve tanë.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.