Rama takon Presidentin e PE, Tajani: Në Pranverë vizitë në Shqipëri me sipërmarrës nga Europa. Njofton projektin e ri për vendet e “Adriatikut”
Kryeministri Rama është takuar në Bruksel me Presidentin e Parlamentit Europian, Antonio Tajani, ku pas takimit kanë zhvilluar një konferencë të përbashkët për mediat.
Në fjalën e tij, Presidenti i Parlamentit Europian Tajani, pasi vlerësoi edhe hapat që ka ndërmarrë Shqipëria, bëri të ditur edhe vizitën që do të zhvillojë në Pranverë, ku së bashku me të do të jenë edhe sipërmarrës nga vendet e BE.
Njëkohësisht, Presidenti Tajani njoftoi edhe përfundimin e punimeve për një projekt në L’Aquila ku përfshihen vendet e Adriatikut, përfshirë edhe Shqipërinë.
“Theksova ecurinë e reformave të rëndësishme në Shqipëri që shkojnë në drejtimin pozitiv për anëtarësimin e Shqipërisë drejt Bashkimin Europian. I referohem posaçërisht reformës në drejtësi, e cila përbën një rëndësi të madhe dhe kjo ndikon në çuarjen përpara të raportit Shqipëri-BE.
Përfunduam punën në L’ Akuila për një projekt të rëndësishëm për vendet e Adriatikut, ku përfshihet edhe Shqipëria, me rezultate të rëndësishme. Ky projekt është i rëndësishëm për të ecur drejt BE.
Në Pranverë do të kem një vizitë zyrtare në Shqipëri me një delegacion, së bashku me sipërmarrës evropianë. T’i japim shtysë dhe raporteve për të krijuar vende pune dhe rritje ekonomike. T’i japim jetë sipërmarrjeve te përbashkëta me qëllim që sipërmarrje të tjera të lindin në vend. E përgëzova kryeministrin për rezultatin zgjedhor. Shqipëria është një vend shembull për dialogun ndërfetar. Të gjitha vendet e rajonit të marrin shembull Shqipërinë. Shqipëria ka bërë hapa parë në këtë rrugëtim me qëllim çeljen e negociatave”, theksoi Tajani.
Nga ana e tij, kryeministri Rama deklaroi se Shqipëria tashmë mund të deklarojë rezultate konkrete dhe se ka përmbushur detyrimet në rrugën e negociatave.
“Jemi këtu për të folur me fakte dhe rezultate, për të çelur më së fundmi negociatat me BE. Ne mbështetemi shumë te miqësia juaj dhe mbështetja e të tjerëve në këtë institucion. Mbi të gjitha vlerë ka rezultati në çdo pjesë të asaj fletoreje të detyrave të shtëpisë. Jemi të kënaqur që Shqipëria mund të dëshmojë se ka hedhur hapa përpara edhe në muajt e fundit do të vijojmë me të njëjtën vendosmëri”, tha Rama.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.