Rama: Vandalët do të ndëshkohen – Kontrata, 120 mijë euro për banorët në nevojë. Brenda 60 ditëve nis informimi
Kryeministri Edi Rama ka zhvilluar një komunikim publik mbrëmjen e së shtunës rreth protestës së dhunshme të paradites në Rrugën e Kombit. Rama është shprehur se përgjegjësit për krimin e rëndë do të ndëshkohen sipas ligjit, ndërsa ka fajësuar opozitën për përshkallëzimin e ngjarjeve.
Sipas Ramës, tarifa e vendosur është jetike për sigurinë e rrugës, gjendja e së cilës është përkeqësuar ndjeshëm.
“U ka kushtuar shumë shqiptarëve Rruga e Kombit. Sot ajo rrezikon të hyjë në fazën e një rrënimi pa kthim, nëse përdoruesit nuk kontribuojnë për mirëmbajtjen e përditshme. Kjo mirëmbatje jetike për sigurinë e lëvizjes në rrugë do të kryhet për 30 vjet me radhë nga kompania e ëprzgjedhur për këtë punë, pas një studimi dhe konkurrimi të gjatë të nisur në vitin 2010”, tha Rama.
Kryeministri u është drejtuar edhe banorëve të zonave përreth që nuk kishin lidhje me ngjarjen, por përsëri nuk bien dakord me tarifën. Sipas Ramës, për ta kontrata me koncesionarin parashikon një subvencionim të tarifës.
“Kontrata parashikon jo vetëm 120 mijë euro çdo vit kontribut i kompanisë për transportin e banorëve më në nevojë, por edhe karta të posaçme abonimi, abone, për përdoruesit e shpeshtë të asaj rruge”, u shpreh Rama.
Informimi i publikut për masat lehtësuese do të nisë brenda 60 ditëve.
ERTV Live?: Komunikim i drejtëpërdrejtë me shqiptarët për krimin e rëndë që u krye ndaj pronës së përbashkët dhe investimit të kryer sipas ligjit, në funksion të sigurisë afatgjatë të lëvizjes dhe mirëmbajtjes së Rrugës së Kombit.
Posted by Edi Rama on Saturday, March 31, 2018
Lexo edhe: http://www.scan-tv.com/protesta-ne-kukes-reagon-basha-te-pezullohet-tarifa-e-te-terhiqet-policia/
Meta reagon pas protestës së dhunshme në Rrugën e Kombit – Apel për qetësi
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.