Rama viziton bizneset, sipërmarrësit: Duhen më shumë nxënës në shkollat profesionale

Teksa arsimi profesional duket se është lënë në hije gjatë mandatit të dytë të kryeministrit Edi Rama, sipërmarrësit vendas kanë ringritur shqetësimin e  gjetjes së punonjësve të kualifikuar për ndërmarrjet e tyre. E ndërsa Rama ishte pranë një fabrike që operon në fushën e  prodhimit të konstruksioneve metalike, përfaqësuesit e saj nënvizuan si problem mungesën e profesionistëve  të rinjve në profilin industrial.

“Specialistët më të vjetër që kemi në ndërmarrje, janë të hershëm. Duam t’i zëvendësojmë me breza të rinj,” nënvizon një prej përfaqësueseve të kompanisë, duke shtuar se më i vjetri prej tyre është sot 76 vjeç dhe për këtë shtroi nevojën e rritjes së numrit të atyre që i drejtohen shkollave profesionale. “E gjitha historia në këtë ndërmarrje është që, duhet rritur shkolla profesionale,” shprehet ajo.

Sipërmarrësi thekson se janë krijuar tashmë nga kompania edhe ambiente të posaçme për të gjithë ata të rinj që duan të bëjnë kurse profesionale, për t’u aftësuar në proceset e punës, në bashkëpunim edhe me qendrat e formimit profesional dhe të gjitha pa asnjë kosto për të përfituar nga këto profesione, ku paga mesatare mujore shkon në 80 mijë lekë.

Gjatë qëndrimit në Elbasan, Rama vizitoi edhe Qendrën e Formimit Profesional të Qytetit si dhe një fabrikë re për prodhimin e lëndës së parë për bateritë e makinave, në të cilën parashikohet të punësohen 200 punëtorë.

Ola Mitre/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.