Rama viziton shesh-ndërtimin e lagjes së re në Tiranë: “Potencial i jashtëzakonshëm për kushte optimale jetese ”

Në planin e rindërtimit pas tërmetit të 26 nëntorit, kryeministri Rama ka premtuar se në Tiranë do të ndërtohen tre lagje të reja.

Në ditën e sotme kreu i ekzekutivit në krah, të kryetarit të Bashkisë Erjon Veliaj kanë qenë në një nga zonat e përzgjedhura për krijimin e një komuniteti të ri, ku do të strehohen njerëzit të cilët tërmeti i la në “qiell të hapur”.

Bëhet fjalë ish-poligonin e vjetër të Vaqarrit me një sipërfaqe mbi 4 hektarë dhe që është në pronësi të shtetit.

Kryeministri ka theksuar se ky është një shans mjaft i mirë për të dhënë shembuj konkretë të një planifikimi urban në të gjitha standardet e duhura:

“Për të gjithë bëhet më mirë. Në këtë rast është tokë shtet që ne do ta vëmë në dispozicion të banorëve. Për fëmijët bëhet mirë sepse kanë afër shkollën, çerdhen, kopshtin. Për më të moshuarit është shumë mirë sepse kanë afër qendrën shëndetësore. Në këtë mënyrë, fitojmë një lloj cilësie dhe shtëpitë do jenë shumë më të mira se ato që ishin.”, tha Rama.

Nga ana tjetër, kryetari i Bashkisë së Tiranës bëri të ditur se toka që është programuar për ndërtimin e kësaj lagje të re është në qendër të Vaqarrit dhe ofron akses në të gjitha institucionet shëndetësore dhe ato arsimore: shkolla, kopshte e çerdhe.

“Këtu është qendra, është në zemër të Vaqarrit, pra njësia administrative, shkolla, kopshti rrethohet e gjitha me shërbime. Kjo është rruga qendrore, që lidhet me Ndroqin dhe Pezën. Praktikisht, ne krijojmë një stil amerikan, ku ka një hapësire të gjelbër në mes, një qendër komunitare për aktivitete të ndryshme, për ndonjë çerdhe, kopsht, mensë apo diçka e tillë, dhe të çiftuara dyshe-dyshe arrijmë të akomodojmë 35 familje nga 43 të prekura në gjithë Vaqarrin administrativ. Pra bëhet fjalë për një banesë monofamiljare, që akomodon familjen bazë, ka një verandë të vogël dhe një pjesë bahçe mbrapa”, tha Veliaj.

Gjithashtu, ai shtoi se në të gjitha këto lagje do ketë dhe një qendër komunitare, kryesisht për kujdes ndaj të moshuarve.

SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.