Raporti AAC/Kompanitë që kanë vonesat më të mëdha, kompensimi i pasagjerëve në shifra rekord

Muaji Tetor tregon se ka një ulje të numrit të fluturimeve të vonuara apo anulimeve, kjo për shkak të uljes edhe të fluksit të fluturimeve.

Nga të dhënat e publikuara nga Autoriteti i Aviacionit Civil rezulton se kompania me numrin më të madh të vonesave është Albawings, për tu pasuar nga kompania Fly Ernest.

“Bie në sy një përmirësim i respektimit të orareve nga kompania “Blue Panorama”, që regjistroi probleme të mëdha gjatë sezonit të verës dhe muajit shtator. Vetë kompanitë i arsyetojnë problemet e mos respektimit të orareve, kryesisht me probleme teknike”, thuhet në raportin e publikuar.

Rekord kompensime shkon në 442 numri i kompensimeve

Një element shumë i rëndësishëm që ka marrë edhe vëmendjen maksimale të AAC është edhe respektimi i të drejtave të pasagjerëve, që lidhet me marrjen e kompensimit në rastet e vonesave apo anulimit të fluturimeve të palajmëruara më parë.

Nga të dhënat zyrtare paraprake që vijnë pranë Sektorit për të Drejtat e Pasagjerëve nga kompanitë ajrore, rezulton se janë gjithsej 442 kompensime në total me nga 250 euro, ose me bileta falas. Por numri pritet të rritet pasi një pjesë e madhe e formularëve të ankimit nuk kanë filluar ende vlerësimin.

Pavarësisht shifrave pozitive procesi po kalon një fazë ngadalësimi për shkak se një pjesë e madhe e pasagjerëve nuk kanë dorëzuar dokumentacionin e nevojshëm te kompanitë ajrore, ndërsa në disa raste nuk kanë kthyer përgjigje në lidhje me atë që ju ka ofruar kompania.

AAC i bën thirrje gjithë personave që kanë plotësuar formularët e ankimimit dhe ka kaluar afati prej 6 javësh, që të rikontaktojnë përsëri kompanitë ajrore që kanë patur fluturimin për tu njohur me statusin e fluturimit të tyre.

Fluturimet Charter

Referuar të dhënave zyrtare në Autoritetin e Aviacionit Civil, shifrat tregojnë një numër prej 299,354 pasagjerë të cilët kanë udhëtuar gjatë muajit Shtator për/ nga TIA, si dhe 46,375 pasagjerë kanë fluturuar me anë të linjave Charter.

Bazuar në të dhënat, kompania ajrore “Blue Panorama” është mbizotëruese në treg duke mbuluar fluksin më të madh të lëvizjes së pasagjerëve për muajin Shtator 2018, me një numër prej 55,817 pasagjerë ose 19% të totalit.

Ndjekur nga fluturimet Charter, me 15% ndaj totalit dhe 46,375 pasagjerë dhe duke vijuar me kompanitë “Albawings” dhe “Ernest S.p.A” të cilat kanë secila 11% ndaj totalit.

Ku shkojnë shqiptarët?

Sipas të dhënave zyrtare, përqindjen më të madhe të tregut të transportit ajror për muajin Shtator 2018 vazhdon ta zotërojë Italia, duke zënë 49% të totalit, ndjekur nga fluturimet Charter me 15% si dhe nga Turqia, me 10%. Sikurse tregojnë edhe shifrat vëmë re se ka një tendencë në rritje nga viti në vit të numrit të pasagjerëve që udhëtojnë nëpërmjet ajrit përgjatë muajit Shtator.

Krahasimisht me vitin 2017, gjatë shtatorit të vitit 2018 një rritje prej 61% të fluksit të pasagjerëve kanë pasur fluturimet Charter. Ndërsa nga viti 2016 në vitin 2017 kanë shënuar një rritje prej 21%. Rritje në përqindje ka pasur gjithashtu edhe numri i pasagjerëve që kanë fluturuar me Charter ndaj totalit të pasagjerëve, rritje kjo sikurse duket edhe në grafikun si më poshtë, prej 15% ndërkohë që në 2017 dhe 2016 përqindja ka qenë 11%.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.