Raporti i BE-së: ‘Rusia po financon mediat për të krijuar konfuzion dhe panik në Perëndim mbi koronavirusin’

Mediat shtetërore ruse dhe mediat pro-Kremlin kanë vendosur një fushatë dezinformimi për të mbjellë “panik dhe frikë” në Perëndim në mes të shpërthimit të koronavirusit, zyrtarët e Bashkimit Evropian paralajmëruan në një raport të brendshëm.

Raporti i përgatitur nga Shërbimi Evropian për Veprim të Jashtëm (EEAS) shprehet se gati 80 raste të dezinformatave në lidhje me virusin Covid-19 janë regjistruar në bazën e të dhënave “EUvsDisinfo” që nga 22 janari.

“Qëllimi kryesor i dezinformimit të Kremlinit është të përkeqësojë krizën e shëndetit publik në vendet perëndimore, veçanërisht duke minuar besimin e publikut në sistemet e kujdesit shëndetësor kombëtar – duke parandaluar kështu një reagim efektiv ndaj shpërthimit,” thotë ai.

Raporti, i datës 16 Mars, thotë se fushata është “e dizajnuar për të përkeqësuar konfuzionin, panikun dhe frikën”. Analiza në raport përshkruan se si funksionojnë mediat pro-Kremlin për të forcuar një seri tregimesh shpesh kontradiktore, të cilat “rrëmbejnë” hapësirën e informacionit për të zvogëluar aftësinë e BE-së për të komunikuar dhe vepruar në interesin e vet.

Kur u pyet për të komentuar pretendimet në një telefonatë me gazetarët të Mërkurën, zëdhënësi i Kremlinit, Dmitry Peskov mohoi që Rusia po ndërmarrte një përpjekje të tillë dhe e quajti atë një “obsesion Rusofobik”.

Burimi: CNN        https://edition.cnn.com/2020/03/18/europe/eu-kremlin-disinformation-coronavirus-intl/index.html

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.