Raporti mbi të ardhurat vendore – Tremujori i parë 2017, 43% më shumë se një vit më parë
Të ardhurat vendore shënojnë rritje të konsiderueshme, gjatë muajve të parë të 2017-ës. Këto të ardhura, sipas raportit të financave vendore të publikuar nga Co-PLAN, për 61 bashkitë janë rritur me 43% në krahasim me tremujorin e parë të vitit 2016.
Burimet kryesore të rritjes janë transfertat ndërqeveritare të kushtëzuara me një rritje prej 358%, transfertat e pakushtëzuara dhe ato specifike për funksionet e reja me 19% dhe taksat dhe tarifat vendore që administrohen nga vetë bashkitë në autonomi të plotë me 64%.
Në tremujorin e parë të vitit 2017, ndërkohë që të ardhurat nga tarifat e shërbimeve janë rritur me vetëm 15% në krahasim me tremujorin e parë të vitit 2016, të ardhurat nga taksat janë dyfishuar.
Sipas studimit të Co-PLAN taksa mbi pasurinë e paluajtshme, është taksa më e rëndësishme që administrojnë bashkitë. Peshën më të madhe e zë taksa mbi ndërtesat në zonat urbane.
Taksa mbi tokën bujqësore mbetet shumë e ulët (vetëm 18% e totalit) ndërkohë që, në tremujorin e parë të vitit 2017 nuk evidentohet asnjë e ardhur nga taksa për truallin urban.
Në total, në tremujorin e parë të vitit 2017, shpenzimet e përgjithshme vendore, të financuara me fonde të vetë bashkive dhe transfertave të kushtëzuara nga ministritë apo konkurruese nga Fondi për Zhvillimin e Rajoneve janë rreth 70% më të larta se në tremujorin e parë të vitit 2016.
Sikurse pritej, me transferimin e funksioneve të reja tek bashkitë, evidentohet një rritje të shpenzimeve për personelin prej rreth 850 milion lekë ose 25% krahasuar me të njëjtën periudhë të një viti më parë.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.