Raporti/Shpenzimet e bashkive për banorët – Kush janë njësitë më “dorëlëshuara”
61 bashkitë në vend kanë rritur shpenzimet totale me rreth 16.7% në vitin 2017 krahasuar me vitin 2016, ndikuar kryesisht nga vijimi i transferimit të funksioneve të reja nga qeverisja qendrore.
Raporti për financat vendore 2017, nxjerr në pah se shpenzimet kapitale shënuan një kthesë të rëndësishme pozitive gjatë kësaj periudhe, ku në total bashkitë investuan rreth 26.5 miliard lekë, rreth 32.9% më shumë se një vit më parë.
Fokusi kryesor i shpenzimeve kapitale të financuara nga të dy nivelet e qeverisjes mbetet infrastruktura e transportit, strehimi, urbanistika dhe ujësjellës-kanalizimet. Luhatjet e forta në nivelin e investimeve varen nga një mori faktorësh përfshirë këtu transfertat nga ministritë e linjës dhe nga FZHR, por edhe nga kuadri ligjor për prokurimin publik i cili kërkon ndjekjen e disa proceseve të cilat mund të kërkojnë një periudhë kohe edhe më të gjatë se 3-4 muaj.
Por nga 61 bashki në total, cilat kanë qenë më dorëlëshuara dhe ato më të mbledhura? Po të shikojmë të dhënat mbi shpenzimet totale, vihet re se gjatë 2017-ës, Bashkia Durrës kryeson listën, ku shpenzimet regjistrohen në vlerën e rreth 3.9 miliardë lekëve, ndërsa bashkia që ka shpenzuar me pak, është Pusteci, me vetëm 70 milion lekë.
Ndërsa sa i përket shpenzimeve totale për banor, ku përfshihen edhe pagat, sigurimet dhe shpenzime të tjera operative, kryeson Bashkia Dropull me 77.096 lekë dhe në fund të listës renditet Bashkia Kamëz me 16.640 lekë.
Investimet më të mëdha në vlerë në shërbim të banorëve i ka bërë Korça dhe investimet më minimale Pusteci.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.